38. Ja jaecuera jei Ichupe: Ore Yara coina ape mocoî kyse pucu. Ja Jae jei ichupecuera: Ipôrâma.
39. Uperire Jae osê ja ojo oyepocuaa jagueicha pe itáatŷra Olivatŷpe, ja jemimboe cuera avei ojo japycueri.
40. Upei catu ôguajêma ramo pe ojo jápe jina Jae jei ichupecuera: Peñemboe peê ani jaguâ peiké pende pya raâ reí jaguâme.
41. Ja Jae oyepea ichugui cuera peteî itá yayapí vaicha, ja oñesû ja oñemboe jeivo:
42. Che Ru, reipota ramo, toyeí Chejegui co mbayru. Opaichavévonte ani oyeyapo Che rembipota, Ne rembipota mante toyeyapo.
43. Upeyave oyejechauca Ichupe peteî yvapegua omombaraetévo Ichupe.
44. Ja ipya yeyopy etereipe jina Jae oñemboe jâtâ jâtâve ja jŷái tuguŷ otykŷ vaicha joava yby peve.
45. Upei catu opuâ pe oñemboe jague gui ja ou jemimboe cuera rendape, ja oyuju oké jicuai ipyambyasy gui,
46. ja Jae jei ichupecuera: ¿Maerâpa peke? Pepuânte ja peñemboe anichene jaguâ peiké pende pya raâ reí jaguâme.
47. Ja oñeê pype jina gueteri sapyaite ou cuimbae atŷra ja upe jérava Judás, peteîva umi doce rejegua vaecue, ou jenonderâ cuera, ja oñemboyá Jesús reje oyurupyté potávo Ichupe.
48. Ja Jesús jei ichupe: ¿Nde Judás, reyurupytépepa reyapyjŷucá co Caraí Raŷpe?
49. Upei catu umi jicuai vaecue iyŷpype ojechama ramo pe oicotava, jei: Ore Yára, ¿roicutútapa kyse pucúpe?
50. Upevove peteîva ichugui cuérava oicutu pe pai guasu rembiguaipe ja oipea ichugui inambi iyacatuapeguape.
51. Upei catu Jesús jei: Pepoíminte Chejegui coarânte. Ja upevo opoco inambi reje ja omyatyrômba.
52. Upei catu Jesús jei umi pai ruvichape ja umi mburuvicha cuera tûpâo rerecuáva ja umi carai ituyávape ou vaecue Jendápe: ¿Peyúpa coicha kyse pucu ja ybyra rejeve peipyjy jaguâicha peteî imondáva rejeguape?
53. Yma aime pype opa árape penendive pe tûpâope nda peipysoi pende po Che reje. Anga pendejáma voí ja ipuaca vaerâjáma upe pytûnguypegua.
54. Upei catu jaecuera oipyjy Ichupe ja ogueraja ja omoingué Ichupe pe pai guasu rogape. Ja Pedro ou japycueri mombyry guivente.
55. Ja jaecuera oyatapy tatapŷi pe corapype, ja oguapy jicuai iyerecuevo ja oi Pedro avei oguapy ipaûmecuera.