4. Upeicha ojo José Galileagui pe tetâ Nazarét gui Judea peve pe David retâ jérava Belén, jae voí David cuérava, ja David rejegua voí,
5. oicuaauca jaguâ jéra. Ja oi jendive María pe omenda ramôva jese ja jae jygue guasúma.
6. Ja oime pype jaecuera upepe ôguajê jiára imembyra jaguâ.
7. Ja oipyjy co imemby cuimbaemi iyŷpy vaecue ja oñuâ Ichupe ao ñeñuâ reípe, ja omoñenó Ichupe peteî cavayú carujápe, ndipóri jague reje jendaguâ pe oñembojupájá rogape.
8. Uperamo oime pe tetâme voínte ovecha rerecua oñangarecóva jymbá reje ja oyopyrúva jicuai pyjarépe.
9. Ja sapyaite Ñandeyára remimbou ogueyŷ Jendápe cuera ja pe Tûpâ Ñandeyára gui jesâcâva ojesape iyerecuevo ja okyjŷyé eterei.
10. Upei catu jei ichupecuera pe yvapegua: Ani pekyjŷyé. Peina coápe che ayu amojerâcuâvo mbae ipyajuva ombojory tuvicha vaerâ opáva ybypórape.
11. Co angue nico oime imembyra ramôva co David retâme, ja pe Mitâ voí penemopôtíjarâ, pe Cristo Ñandeyára upéva.
12. Cova reje pejechacuaane: peyujune pe Mitâ me oñeñuâ mitâ ao ñeñuâ reípe, ja oñeñó peteî cavayu carujápe.
13. Ja sapyaite oico pe yvapegua ndive jeta umi yvagapegua cuérava oguero purajéivo omombeu guasúvo Tûpâ Ñandeyárape, ja jeivo:
14. Toñembueté Tûpâ Ñandeyára yvaga yvatéetévéjápeve ja co ybyari toyeico pôrâ oñondive jecoitépe umi ybypóra umi oguerojorŷva Ichupe.
15. Upei catu oyeíma ramo umi yvapegua oyeby jaguâ yvape, umi ovecha rerecua jei oyoupe: Yaja mandi Belénpe yajecha jaguâ pe mbae oyeju ramôva co Ñandeyára oicuaaucáva ñandeve.