28. Upei catu Jesús jei: Upe pejupi jaguâ ára co Caraí Raŷpe, uperamo pejechacuaane Che jaejá, ja Che ndayapoijá mbaeve Cheyejegui, ja Chemboe jagueicha Cheve pe Túva, upeichaite Che añeê.
29. Ja upe Che mbou vaecue Cheve oi Chendive. Jae nda che reyai tyreŷ Cheve ayapojá reje tapia pe oguerojoryva Ichupe.
30. Ja oñeê cuévo umimbae Jae, oime oyeroviá Jese jetáva.
31. Upegui Jesús jei umi Judiope oyerovia vaecue Jese: Pepytá jâtâ ramo co Che ñeême añetejápe, peê Che remimboe jaetéva.
32. Ja peê peicuaane pe ñeê jecoitépegua ja pe ñeê jecoitepegua rupi peê peñemboíne ipoguŷ gui.
33. Upei catu jaecuera jei Ichupe: Abraam rejegua cuérava ore, ja máramo no roñembo tembiguai avave po guŷpe. ¿Mbaépa jeise co Nde eréva Peê peñemboíne ipoguŷ gui?
34. Ja Jesús jei ichupecuera: Añete Che jae peême oimeraêva oñemo angaipa oñembo tembiguai angaipa guŷpe.
35. Pe tembiguai ndopytai tapia guârâ iyára rogape, upe taŷrante, upéva catu opyta tapia guârâ.
36. Upeicharamo pe Taŷra penemboí ramo peême pende yara po guŷ gui, uperamo pesêne pende aetéva ramo añete.
37. Aicuaa voí peê Abraam rejegua cueravajá peê. Upeicha ramo yepe peê peñejaâ Che yuca jaguâ, nda iyái gui Che ñeê pende pyape.