1. Uperire Jesús oyejechauca yeby jemimboe cuerape pe ŷ Tiberias ypype. Ja coicha voí oyejechauca.
2. Sapya oi oñondive Simon Pedro ja Tomas, jérava avei Didimos, ja Natanael pe Canaŷgua Galilea pegua, ja Zebedeo raŷ cuera, ja mocoî jemimboe cuera ambue avei.
3. Ja Simon jei ichupecuera: Che ajata aicutu pirá. Ja jaecuera jei: Torojo ore avei nendive. Upeicha oyeoi ja oyupi imbayrupe. Ja sapya upe pyjarepe nôguenojêi mbaeve pirá.
4. Ja pe pyjaréveté sapya oime oñemboŷ Jesús pe ybype pe ŷ rembeŷpe. Ja ndo jechacuaai umi jemimboe cuera Jesúsjá.
5. Upei catu Jesús jei ichupecuera: ¿Peê cariaŷ cuera, perecópa mbae yau vaerâ? Ja jei Ichupe: Ndipori.
6. Ja Jae jei ichupecuera: Pemuasâi pende pyjá pene mbayru acatua coty, ja peyujúne mbae. Upei catu omuasâi ipyjá, ja upegui ndicatuvei ojupi yeby ipyjá jeta eterei gui pirá.
7. Upei catu pe jemimboe Jesús ojaŷjúvéva jei Pedrope: Upea Ñandeyára! Upei catu Simon Pedro ojenduma ramo Ñandeyárajá oyecúacuá iyaope, (opívo oi oicovo), ja oyeity pe ŷpe.
8. Ja umi jemimboe cuera ambuecue ou imbayru rejeve, na imombyryi gui pe ŷ rembeŷ gui icatu cien metroichante, oguerúvo ipyjá umi pirá rejeve.
9. Ja ogueyŷma ramo ybype ojecha tatapŷi jendŷva, ja oime pirá jiari ja oime avei mbuyapé.
10. Ja Jesús jei ichupecuera: Erúnte umi pirá penôjê ramô vaecue gui.
11. Upei catu Simon Pedro oyupi yeby pe mbayrupe ja ogueru pe pyjá ybype jenyjê pira tuvicháva gui ciento cincuenta tres pirá, ja jeta eterei ramo yepe ndosoroi pe pyjá.
12. Ja Jesús jei ichupecuera: Peyú ape peu. Ja uperamo voí ndipori peteî jemimboe cuérava oporanduséva Ichupe avápa Nde? Oicuaa voí Ñandeyárajá.
13. Upei catu Jesús ou ja oipyjy pe mbuyape ja omeê ichupecuera ja upeicha avei pe pirá gui.
14. Upea pe mbojapŷjá yebyma Jesús oyejechauca jague jemimboe cuerape oicove rire umi omano vaecue paûgui.
15. Ja ocarúpá rire Jesús jei Simon Pedrope: Nde, Simon, Jonas ray, ¿nde aévépa Che reje coâva ambuegui? Ja jae jei: Jeê, che Yára, Nde reicuaa voí che rojayjújá Ndeve. Ja Jae jei ichupe: Eñangarecónte, upeicharamo, Che ovecha raŷ cuera reje.
16. Ja jei yeby ichupe: Nde, Simon, Jonas ray, ¿nde aépa Che reje? Ja jae jei: Jeê, che Yára, Nde reicuaa voi che rojayújá Ndeve. Ja Jae jei ichupe: Eicónte, upeicharamo, Che ovecha rerecuá ramo.
17. Upei catu Jae jei ichupe mbojapy yebŷjápe: Nde, Simon, Jonas ray, ¿Che rayjúpa Cheve? Upei catu Pedro ombuasy eterei Jae jei jague reje mbojapy yeby jápe: ¿Che rayjúpá Cheve? Upeareje jei Ichupe: Che Yára, Nde nico reicuaa opambae. Nde reicuaa voí che rojayjújá Ndeve. Upei catu Jesús jei ichupe: Eñangarecónte upeicharamo, che ovecha cuera reje.
18. Añete co che jaéva ndeve. Yma nde pyajúve yave pucu cue nde reyecúacuá vaecue ndeyejegui vointe, ja rejo mamo rejose jaguepe. Arévé nde tuyávévo nde reipysóne ndepo ja oimene ambuecue nde yocúacuá vaerâ, ja nde rerajá vaerâ mamo rejose ŷ jaguâme.
19. Upeicha jei Jae oicuaáucá jaguâ mbaéichapa omano vaerâ ombotuvicha jaguâ jecope Tûpâ Ñandeyárape. Ja jeipávo upea ichupe, jei: Eyo Che rapycueri!
20. Upei catu oyere Pedro ja ojecha pe Jesús remimboe pe Jae ojayjúvévape ou ramo japycueri: upeva catu upe oyecó vaecue ipytia reje pe ocaru jaguepe ja jei vaecue: Ore Yára ¿mávapa pe Nde yapyjŷucájarâ?
21. Upeicharamo ojechama ramo ichupe, Pedro jei Jesúspe: Che Yára, ¿cóvapa mbaepa?
22. Ja Jesús jei ichupe: Che aipota ramo jae opyta Che ayu yeby ramo guârâ ¿mbaeico nde? Nde catu eyo Che rapycueri.
23. Upeguive oñemojerâcuâ umi jemimboecuera apytepe upe jemimboe nomano vaerâijá. Jesús voí ndeiri ichupe jae nomanoi jaguâ, jeinte: Che aipota ramo jae opyta Che ayu yeby ramo guârâ, ¿mbaeico nde?
24. Upéva catu pe jemimboe oicuaáucáva jina âmbae gui ja omoî vaecue âmbae co cuatiápe ja yaicuaa añetéjá co oicuaauca vaecue.
25. Oime voi jeta mbae ambue Jesús oyapo vaecue, ja oñemoîmbá ramo cuatiápe peteî teî umimbae, che aimoâ nda co ybyari yepei nda iyápái moâ jaguâ umi cuatia tecôtevê vaerâ moâ oyeyapo jaguâ.