1. Upemaramo oporandu pe pai guasu upéichapa rae?
2. Ja jae jei: Peê carai cuera, che reŷícuera ja ore ru cuera, pe cherendúmi cheve. Tûpa Ñandeyára yvaga Ruvicha Guasu oyejechauca vaecue ñande ru ypycue Abraampe pe oijape jae Mesopotamiape oico mboyve voi jae pe Charanpe.
3. Ja jei ichupe: Esênte eyeí co neretâgui ja co nde reŷí cuera apytegui ja eyo evá pe yby Che ajechauca jaguâme ndeve.
4. Upemaramo jae osê umi Caldeo retâgui ja oico Charanpe ja upegui ituva omano rire jae oguerová co tetâme peicojápe peêcuera coanga voí.
5. Ja nomeê raei ramo yepe ichupe mbaevete upepegua imbaéteérâ nda ipy rendâgua tuvichacue yepei, oicuameê yepe ichupe omeê jaguâ pe tetâ voi imbaéteérâ ichupe ja itayracuera jaerire guarépe, nda itayrai yepe gueteri rae.
6. Ja coicha oñeê ichupe Tûpâ Ñandeyára jeivo: Umi jesegua cuera oicone pytaguaicha peteî tetâ ambuépe ja upe tetâmegua oyocuaine ichupecuera jembiguai ramo ja oguereco asŷne ichupecuera irundy cien años peve.
7. Ja pe tetâmegua oyocuai vaecue ichupecuera jembiguai ramo, Che ayepŷne jesecuera, jei Tûpâ Ñandeyára, ja uperire osêne pe tetâgui ja Che mbueténe oicovo cova co tendape voí.
8. Uperire omboe ichupe pe omongarai jaguâ oñocuameêpype oñopaûme. Ja upeicha Abraam omoñemoña ramo Isaácpe, pe ocho arajápe omongarai ichupe oipireo pype itui apyra. Ja upeicha aveí Isaac oyapo Jacobpe ja Jacob oyapo umi doce ñande ru ypycuepe.
9. Ja umi ñande ru cuera ymaguare jacateŷ gui José reje oñemû jese ja oguerajáucá ichupe Egiptope.
10. Opaichavo oico Tûpâ Ñandeyára jendive ja omboi ichupe opa ojasa asy jague gui mârâ ŷ reje, ja omeê ichupe ipyapôrâ ja iñarandú pôrâ jaguâ pe Faraon Egipto mburuvicha guasu renondepe. Ja upéva omoî ichupe pe Egipto retâ ruvicha ramo ja opa jogapeguape omoî ipo guype.
11. Uperamo oico ñembyajyi tuvicha oparupi pe Egipto retâme ja pe Canaan retâme ja jeta ojasa asy, ja upeicha avei ñande ru cuera ymaguare ndoyujui jou vaerâ.
12. Upei catu Jacob ojenduma ramo oimeja avati Egiptope omondo ñande ru cuerape iñypyrúrâ.
13. Ja pe mocoî yebŷjápe ojo ramo, José oyejechacuaáucá oyupe tykeyra cuerape ja oicuaáucá pe Faraonpe avei umiva José reŷícuerajá.
14. Upei catu José omondo ja ojenoîucá tuva Jacobpe ja opa jesecueraguape: jetacue voí setenta cinco jaecuera.
15. Upeicha ová Jacob Egipto retâme ja upepe omano, ja omano avei ñande ru cuera ypycue,
16. ja oyererajá jetecué cuera pe tenda Sichemme ja oñeñotŷ pe itacuápe pe oyogua vaecue Abraam mbaerepy reje pe Hamor pe Sichemŷgua raŷcueragui.
17. Ja jiâguíma ramo pe jiára oicopá jaguâ pe Tûpâ Ñandeyára oicuameê vaecue Abraampe, oime oñembo tuvicha ja oñembo jetá jetáve umi jesecueragua pe Egipto retâme,
18. ja uperamo opuâ mburuvicha guasu ambue Egiptope oicuaa ŷ vaecue Josépe.
19. Upeva ipichyguy ja iñarandú cue reje ombotabŷ umi ñande reŷícuera ja oguereco vaí umi ñande ru cuerape ojo jaguâicha jaecuera omombo rei imitâ cuerape omano jaguâme ipocâ jaguâ upeicha jesecueragua.
20. Ja umi jaárape voi oñemoña pe Moises ja jae ipôrâite eterei ja oguerojory Ñandeyárape ja oime mbojapy yasy peve ocacuaa ituva rogape.
21. Ja uperire omombo rei ichupe omano jaguâicha, ja sapya uperamo pe Faraon rayŷ oyuju ichupe ja ogueraja ichupe omongacuaa jaguâ imembŷteéicha.
22. Ja upeicha pe Moises oñemboe opa umi Egipcio aranducue reje ja icatupyrŷ iñeême ja jembiapópe.
23. Uperire ombotŷ rire cuarenta años sapya jiâ ichupe oñandu jaguâ jeŷícuerape umi Israel cuérava voí.
24. Ja sapya ojecha peteî jaecueravape ojasa asy ramo, ja ojo oipytyvôvo ichupe ja oicutu pe Egipciope oyepŷvo pe ojasa asy vaecue reje jápe.
25. Jae oimoâ voi jeŷícuera ojechacuaa vaerâ moâjá Tûpâ Nandeyára opoíucá jague ichuguicuera iporupi. Jaecuera voí ndojechacuaainte.
26. Ja upe ára ambuepe oime jaecuerava oñorayrôva oñondive jicuai ja jae oyejechauca ichupecuera ja omoñyrôse oñondivecuera, ja jei: Peê cuimbae cuera oyuejegua voí peê. ¿Maerâpa peyoguereco vaí pendeyoupe?
27. Ja upe oguereco asy vaecue jina upe japichápe omuaña ichupe ja jei: ¿Avápa nemoî ndeve mburuvicha guasu ramo ja mburuvicha ramo ore rejeve?
28. ¿Che yucásépa cheve avei cueje reyuca jagueicha pe Egipciope?
29. Ja ojendu vove coa ñeê Moises oñeguajê ja oico pytagua ramo pe Madian retâme ja upepe omoñemoña tayra mocoîme.
30. Ja oñembotŷma ramo cuarenta años oime peteî yvapegua oyejechauca ichupe pe ñûme pe itáatŷra guasu Sinai guŷ reje peteî tata rendy yuapeca apytepe.
31. Ja Moises omaê ja ojecharâmô pe ojecha vaecue, ja ôguajê iyŷpype ojecha pôrâve jaguâ, ja upepe oico ichupe pe Tûpâ Ñandeyára ñeê,
32. jeiva: Che nde ru cuera Tûpâ Ñandeyára, Abraam Tûpâ Ñandeyára, ja Isaac Tûpâ Ñandeyára, ja Jacob Tûpâ Ñandeyára. Ja Moises okyjŷye oryryipá ja oyepoŷjú omaêve jaguâ.
33. Upei catu Ñandeyára jei ichupe: Pemboínte nde pŷrejegua. Co tenda reimejá reñemboŷjápe yby caraí voí.
34. Che ajechama, Che ajechama oyeyopŷetéjá co Cherejegua jicuaiva Egipto retâme ja ajenduma ipyajê ramo jaecuera ja agueyŷma apoíucá potávo ichuguicuera. Coanga eyo toromondo ndeve pe Egiptope.
35. Upe Moises jaecuera omomârâ vaecue jei ramo guare: ¿Avápa nemoî ndeve mburuvicha guasu ramo ja mburuvicha ramo? Cóvape catuetei Tûpâ Ñandeyára ombou rae mburuvicha ramo ja oporombopoíjarâ ramo pe yvapegua po rupi pe oyejechauca vaecue ichupe pe yuapecá apytepe.
36. Upéva ôguenojê ichupecuera oyapo pype mbae jechapyrâ ja mbaeguasu pe Egipto retâme ja pe ŷguasu Bermejope, ja pe ñû rupi umi cuarenta años peve.
37. Cóva pe Moises jei vaecue umi Israel cuéravape: Oimene Tûpâ Ñandeyára omopua vaerâ peteî ñemoñeêjarâ pende rejegua gui cheichagua. Upévape catu peêcuera pejendu vaerâ.
38. Cóva nico pe oi vaecue umi oñembyatŷ vaecue Ñandeyára rejeguarâ ñûme pe yvapegua ndive pe oñemongueta vaecue jendive pe itá atŷra guasu Sinai rupi ja ñande ru cuera ndive avei, ja oñemeê ichupe umi Ñeê Jecovéva omeê jaguâ ñandeve.
39. Upévape ñanderu na iñeêrendúséi vaecue, jaecuera omomârânte ichupe ja oyepea ichugui ipyapype oyeresévo Egipto retâme jeivo Aaronpe:
40. Eyapo oreve Ñandeyára raânga cuerarâ ojo vaerâ ore renonderâ. Co Moisesgui upe ore renojêjaré pe Egipto retâgui, ndo roicuaai mbaépa oyeju ichupe raé.
41. Ja oyapo jaecuera vaca ray raângá ja oicuameê mbae carai co taângápe ja oguerojory co taânga oyeyapo vaecue ipo rupi cuera.
42. Upémaramo Tûpâ Ñandeyára oyepea ichugui cuera ja omeê ichupecuera ombueté jaguâ umi mbae yvapeguape jei jagueicha ñemoñeêjara pe Santa Escriturape: ¿Chevepa raé peicuameê peê Cheve pene rymba yucapŷré ja japŷpŷré pe ñû rupi cuarenta años pucu cue yave peê Israel cuérava?
43. Perajá voínte vaecue penendive pe Moloc tûpâo ja pe pene tûpâ ñandeyára Remphan raângá, taângánte voi umia peê peyapo vaecue peñesû jaguâ. Che catu poguerajaucane peême pe Babilonia gui amongotŷetévé.
44. Oguereco voi vaecue ñande rucuera pe tûpaô aoguigua oyejechauca jague ichupecuera Tûpâ Ñandeyára pe ñûme oyapouca jagueicha upe oñemongueta vaecue Moisespe oyapoucá jaguâ jecópe upe taângá ojecha vaecue rupi voí.
45. Pe tûpâo oñemeê vaecue ichupecuera ñande ru cuera avei ogueru co tetâme Josué ndive oyapyjy ramo guare umi pytagua yby umi Tûpa Ñandeyára omosê vaecue ñanderu cuera renondegui ja opyta ape pe David ára cuerapeve.
46. Upéva voí oyejayjúucá Tûpâ Ñandeyárape ja oyerure iya jaguâ reje ichupe oyapo jaguâ tûpaô pe Jacob Tûpâ Ñandeyára peguârâ.
47. Pe Salomon yepe upe oyapo vaecue ichupeguârâ tûpâo.
48. Upeicharamo yepe Tûpâ Ñandeyára yvapegua ndoicoi tûpâo iyapopyre ñande po rupi pe jei jagueicha pe oñemoñeêjaré:
49. Pe yvaga nico Che guapŷjá ja pe yby Che py renda. ¿Mbaeichagua ogapa peyapota Cheve? jei Nandeyára, terâpa mamo oimene Che apytuu jaguâ renda?
50. ¿Ndoyapoipa racae Che po opa âmbae?
51. Peê pende ayura jâtâma nipo, ja pende pyape na pende carai recoi, ja pende apysape upeicha avei! Peê pemomârâ tapiáva Espiritu Santope oyapo jagueicha pende ru cuera ymaguare, upeicha avei peyapo peê.
52. ¿Mavape umi oñemoñeêjárapa ndoguereco asŷi racae pende ru cuera? Oyuca voí vaecue jicuai umi omojerâcuâ vaecuepe ou vaerâjá pe Imarangatuetéva. Upévape coanga peê iyapyjŷjaré ja iyucajaré avei.
53. Peême nico oñemeê vaecue pe Ñandeyára rembiapoucapŷ Ñandeyára remimbou rupi, upeicharamo yepe na pembuayei peê.
54. Upeyave ojendu yave jicuai umi mbae tuvicha oyererovu ja ombopururu jâicuera icotŷ cotŷ.
55. Ja jae jenyjê Espiritu Santo gui omaê jâtâ yvaga reje ja ojecha Tûpâ Ñandeyárape oñembotuvichajápe ja Jesúspe avei oijape Tûpâ Ñandeyára acatuape,
56. ja jei: Peina ajecha pe yvaga rokê oyepea ramo ja pe Caraí Raŷ oi ramo oñemboŷjape Tûpâ Ñandeyára acatuape.
57. Upei catu osapucai jâtâ jaecuera ja omboty iyapysa icuâme ja oyeitypá opavavé oñondivépá jesé.
58. Ja ôguenojê ichupe pe tetâgui ocape ja upepe oyapi itápe: ja oime umi jechajaré omoî iyaocuera peteî cariay jérava Saulo py renondepe.
59. Ja oyapi itápe Estebanpe oñemboéjápe jae ja ojenoîjape Ñandeyarape jeivo: Ñandeyára Jesús, eipyjy che anga.
60. Ja oñesu jynypyárejejápe osapucai jâtâ: Ñandeyára, ani remboyá co angaipa jesécuera: ja jeipávo coa oké.