27. Upegui oguerúma ramo ichupecuera omoingué ichupecuera pe coty oñomongueta jaguâme. Ja pe paiguasu oporandu ichupecuera,
28. jeivo: ¿Ndo roeipa rae peême ndo roipotaijá peê peporomboe Upéva rérape? ja peina jina oime pemuenyjê nerae co Jerusalem pene poromboegui, ja pemboyásé rei yeco co Cuimbae ruguycue orereje.
29. Upei catu Pedro ja umi Apostol cuera oñeê ja jei: Tecôtevê ore ñeêrendú Tûpâ Ñandeyárape ja na umi carai cuerapei.
30. Upe ñanderu ypycue Tûpâ Ñandeyára omopuâ Jesúspe pe peyuca vaecue peê pemosaingo pype ybyra yoasá reje.
31. Covape Tûpâ Ñandeyára omboyupi rae iyacatuape Ñande Rapecuaajarâ ja Ñane mopôtíjarâ ramo omeê jagua Israel cuéravape oñembo jecopyaju jaguâ ja oyepea jaguâ iñangaipa gui.
32. Ore voi jechajaré ramo roicuaauca añetéjá co roéva ja upeicha avei omoañeté pe Espiritu Santo upe omeêva Tûpâ Ñandeyára umi iñeêrendúvape Ichupe.
33. Upei catu ojendu pype umi mbae ipochy eterei ja oñomongueta oñondive oyucaucá jaguâ ichupecuera.
34. Uperamo oñemboŷ pe cotype peteî fariseo, jérava Gamaliel, carai iñaranduva ja icaavóva opa pe tetâmegua ndive, ja jae ôguenojêuca ocape sapyami umi cuimbaepe.
35. Upei catu jei ichupecuera: Peê carai Israel cuérava, Chaké! peñeñangarecóke co peyapótava co cuimbae cuera reje.
36. Na ymámai voí opuâ jague Teudas oñemo mbaeguasúsévo ja oime oñembyatŷ vaecue ichupe irundy cien cuimbae. Upéva oyeyuca, ja opa umi oyerovia vaecue jese oñemuasâimba ja ndojupityi mbaevetérâme.
37. Uperire opuâ pe Judas pe Galileaŷgua umi ára mburuvicha oipapáucá jague ñande retácué, ja upéva ogueraja jeta cuimbae japycueri. Upéva avei omano, ja opa umi oico vaecue jendive oñemuasâimba.
38. Ja coanga catu che jae peême pepoínte umi carai gui ja pejeya rei ichupecuera. Sapya co iñaranducue ja co jembiapocue ybypóraguiguante ramo, opytá reíne,
39. ja sapya Tûpâ Ñandeyáraguigua ramo, peê ndicatuichene pemombá. Chake! anichene tamo peyeyujú peñorayrô Tûpâ Ñandeyára coty coty.
40. Ja upeicha jaecuera omboayé ichupe. Ja upei catu ojenoî umi Apostol cuerape ja oinûpâucá ichupecuera ja uperire jei ichupecuera anive jaguâ mbaeveicharamo oñemoñeê pe Jesús rérape ja uperire opoí ichuguicuera.
41. Ja jaecuera oyeói pe mburuvicha cuera renonde gui oyoguerojory oyeóivo iya jague reje ichupecuera oyeyaó jaguâ Upéva Réra reje jápe.
42. Ja opa árape pe tûpâope ja umi oga cuera rupi oico, ja oporomboe ja omojerâcuâ Evangelio Jesu Cristo guiguare opytuú ŷ reje.