1. Upei catu Agrippa jei Pablope: Icatuma reñeê ndeyeje voínte. Upemaramo Pablo omopuâ ipo ja oñypyrú oñeê oyeje jeivo:
2. Che arojory che poaite gui coanga nerenondepe voí, che mburuvicha guasu Agrippa, añeê jaguâ cheyeje opa âmbae umi Judio chereje omboyávagui.
3. Ja abŷávé nde reipocuaápá járeje ore Judio reco ja mbae yuabŷ. Upevareje ayerure ndeve cherendumi jaguâ reyajéi ŷ reje che reje.
4. Che recocue voí che cariaŷ guive iñypyrumbŷ guive voí aico ramo guare che retâ Jerusalempe opa umi Judio oicuaápá.
5. Ja jaecuera oicuaa pôrâ voi avei--sapya oicuaáucáse ramo jecópe--che recocue iñypyrumby guive voí umi ipojyivéva ja jacateŷvéva iñemboecatuva orereje cueraguá jaicha guante jague ja yaico jague Fariseoite voí.
6. Ja coanga che ajáârôjáreje pe oicuameê vaecue Tûpâ Ñandeyára ore ru ypycuepe, upévareje voi añejenoî mburuvicha renondepe.
7. Upe Tûpâ Ñandeyára remicuameêmbŷ voí umi doce ore reŷí cuera oñejaâ catuetei oñemboe pype tapiaite ára ja pyjare ojaârôjápe ojupity jaguâ. Ja che avei ajaârô járeje peteîcha, che mburuvicha Agrippa, añemombeu umi Judio rupi voí.
8. ¿Mbaerejépa peimoâ vaerâ mbae oyerovia ŷ vaerâjá Tûpâ Ñandeyára omoingove yeby jaguâ umi omano vaecuepe?
9. Che voí añetejápe aimoâ vaecue ayapo vaerâ jaguâ jetambae Jesus Nazareno Rera coty coty.
10. Umimbae avei ayapo voi vaecue Jerusalempe ja amoingue ybyracuape jeta umi imarangatúvape oñemeê jagueicha cheve upearâ voi chepope umi pai ruvicha rupi, ja oñemoî ramo oyuca jaguâ ichupecuera che ameê vaecue che ñeê avei,
11. ja umi tûpâorupi jeta yeby ayopy aicovo jesecuera ja amoñeê vaí ichupecuera. Ja che pochy tarová eterei gui icoty coty cuera aico japycueri cuera amoñávo umi pytagua retâmeve yepe.
12. Upearâ voí aipyjy tapé aja jaguâ Damascope che pope omoî jaguereje cheyocuaivo umi pai ruvicha,
13. ja sapyaite ára mbyte ramo, che carai guasu, ajecha pe tapépe peteî jendyva yvaguivo overávéva cuarajŷ gui ja ojesapépa cheyerecuevo ja umi ojo vaecue chendive yerecuevo avei.
14. Ja roapá ore ybype ja ajendu peteî osapucaiva cheve chemonguetavo Judio Hebreo ñeême: Saulo, Saulo, ¿maerâpa chemoña? Mbae ipojyiva ndeve repyvoi pe nde yopijá reje!
15. Upei catu che jae: ¿Avápa nde, che carai? Ja jei Ñandeyara: Che nico Jesús co chemoñava reicovo.
16. Epuâ ja eñemboy nde pŷreje. Upearâ voi ayejechaucá ndeve royocuai jaguâ che rembiguai ramo ja reicuaáucá jaguâ umi mbae rejecha ramôva ja umimbae avei ayejechaucá jaguâ ndeve.
17. Che romboíne aicovo umi tetaŷgua gui ja umi pytagua po guŷ gui, umiva rendape voí coanga romondo,
18. reipea jaguâ jesa cuera oñemboyere jaguâ pe pytûguŷgui pe jesâcâjápe ja pe mbae pochŷ poguŷ gui Tûpâ Ñandeyárape ojupity jaguâ oyerovia gui Che reje oyeí jaguâ iñangaipa cuera ja oyoerecua jaguâ umi imarangatuva ndive yvagape.
19. Upegui, che mburuvicha guasu, Agrippa, che na cheâcâ jâtâi oyejecháucá ramo guare cheve pe mbae yvapegua.
20. Upegui umi Damascopeguape raê ja uperire umi Jerusalemŷguape ja oparupi Judea retâ rejeguape, ja umi pytaguape avei añemoñeê aicovo oñembo jecopyajú jaguâ pyambyasyjápe oñemboyére jaguâ Tûpâ Ñandeyárape ja oyapo jaguâ tembiapo pôrâ oyapojaichagua pe oñemboyeréva jecópe.
21. Upevareje umi Judio che pyjy vaecue tûpâope ja oñejaâ che yucá.
22. Upegui Ñandeyára che pytyvô ipya pôrâgui voí. Ja che aico upeicha jecópe co arapeve aicuaaucávo mîchîvape ja tuvichávape mbaeve, umi mbae mante umi oñemoñeêjára ymaguare ja Moises jei vaecue ou vaerâ jaguâ,
23. pe Cristo ojasa asy vaerâ jaguâ ja jae iyŷpy vaerâ jaguâ opuâ yeby jaguâ umi omano vaecue paûgui omojerâcuâucá jaguâ pe ojesapéjarâ co tetâmeguape ja umi pytaguape.
24. Ja oñeêma ramo iyeje umimbae jae, Festo jei ichupe osapucaijape: Nde tarová, Pablo. Ne aranduete guima reñembotarova.
25. Ja jei Pablo: Nda che tarovái che, che carai guasu Festo. Añetegua co jaeva, ja che âcâ pôrâ guínte añeê:
26. oicuaa pôrâ nico co mburuvicha guasu umimbae gui ja upévareje voi añeê akyjŷye ŷ reje jenondepe. Ja aimoâ añetejá ndiporijá mbaeve âmbaegui ojechacuaa ŷ vaecue jae. Co âmbae ndajaei oyeyapo vaecue tenda ruguá iñypytûjápe guape.
27. Che carai guasu Agrippa, ¿reroviápa nde umi oñemoñeêjaré ñeêngue?
28. Che aicuaa pôrâ voi nde reroviájá. Upei catu jei Agrippa Pablope: Vocoi che reroviáucá añemongarai jaguâ Cristo rejeguarâ.
29. Ja jei Pablo: Ta vocoi terâ ta curive che añemboe Tûpâ Ñandeyárape mbaeicha tamo na ne añoi yepe, peê ambuecue che rendúva guive cheve coanga peyeyapópá cheicha, co che ñapytîjá ŷ reje mante.
30. Ja jei vove umimbae opuâ pe mburuvicha guasu ja pe mburuvicha ambuecue ja Bernice ja umi oguapŷva jendive cuera,
31. ja oyepeapá maramo jaecuera oñomongueta oñondive jeivo: Mbaeve ivaíva ndoyapoi co carai oyeyucáucá jaguâicha terâ oñeñapytîucâ jaguâicha yepe.
32. Ja jei Agrippa Festope: Icatu vaerâ moa oyepoí co carai gui ojenoi ŷ rire Caesarpe iyejejápe.