6. Ja roñañuápá oñondive, ja upegui royupí pe mbayru ári ja jaecuera ojo yeby jogape cuera.
7. Ja ore cuera roicopama ramo ŷrupi Tirogui rogueyŷ Tolemaidape, ja upepe roñandu umi ore reŷícuerape ja ropyta jendive cuera peteî ára.
8. Ja pe ára ambuepe rosê yeby ja royú Cesareapeve ja roiké pe Felipe pe Evangelista rogape. Upeva voi peteîva umi siete rejeguava ja ropyta jendive.
9. Jae oguereco irundy tayŷra omendaŷva ja umiva oñemoñeêjára avei.
10. Ja ore ropyta upepe jeta ára. Ja upeyave ou Judea gui peteî ñemoñeêjára jérava Agabo.
11. Ja ou jae oreandúvo ja oipyjy Pablo cúa yopŷjá ja oñeñapytí opy ja opo ipype, ja jei: Coicha jei cheve Espiritu Santo: Pe cuimbae co cúayocuájá yarape umi Judio oñapytîne coicha Jerusalempe, ja omeêne ichupe umi pytagua pope.
12. Ja ojenduma ramo âmbae royerure ichupe ore ja umi upepegua avei ani jaguâ ojo Jerusalempe.
13. Upei catu jei Pablo: ¿Mbaepa peyapo peyajeóvo ja che pyapŷvo upeicha? Coina che aicopama na añeñapytî jaguâ añói, amanoite jaguâ avei catuetei Jerusalempe pe Ñandeyára Jesús réra rejejápe.
14. Ja ndicatuveima ramo royoco ichupe ore rokîrîrî ja roe mante: Toyeyaponte, upeicharamo, Ñandeyára rembipota.
15. Ja umi ára rire roñembosacoi rojo jaguâ Jerusalempe.
16. Ja oime oremoîrû vaecue Cristo remimboecuera Cesareaguigua ja ore reraja Mnason rendape, pe Ciproŷgua, Cristo remimboe rejeguava yma guive voi, upéva voí pe ore rerojory vaerâ ombojupá cueraramo.
17. Ja roguajê vove Jerusalempe, umi ore reŷi cuera ore rerojory torypápe.
18. Ja upe ára ambuepe Pablo ojo orendive roñandúvo Jacobope ja oñembyatŷpá umi carai ituyáva,
19. ja omomaiteima ramo ichupecuera jae omombeúpáite ichupecuera opambae Tûpâ Ñandeyára oyapo vaecue umi pytagua apytepe jembiapo rupi.
20. Ja jaecuera ojenduma ramo umimbae ombotuvicha Tûpâ Ñandeyárape ja jei Pablope: Nde rejechamanerae, ore reŷi, jeta etereímajá umi Judiocuera apytegui oguerovia vaecue ja opavave umiva jacateŷjá pe Moises ñeêngue reje.