34. Ndajaei upe David pe oyupi vaecue yvagape. Jae voínte jei vaecue: Jei vaecue Ñandeyára Che Yárape: Eguapy Che acatuape,
35. amoîmbá meve umi iyaeŷva Ndereje Nde py renda ramo.
36. Upevareje peicuaa pôrâ vaerâ añetejápe opavavé peê Israel cuérava Tûpâ Ñandeyára omoingôma jague Ñandeyara ramo ja Cristo ramo co Jesús voi peê peyucáucá vaecue curusú reje.
37. Upei catu ojenduma ramo umimbae oyepyapy jicuai ja jei Pedrope ja umi Apostol cuera ambuepe: Peê caraicuera, ore reŷi cuera ¿mbaépa royapota?
38. Ja jei ichupecuera Pedro: Peñembojeco pyaju mbyasŷjápe peñemongaraíucá jaguâ peteî teî peêcuérava Jesú Cristo rérape pene pôtí jaguâ pene angaipa gui ja oñemeê reí jaguâ peême pe Espiritu Santo.
39. Peêmeguârâ voí pe jemicuameêngue ja pende raŷcuera peguârâ ja opa umi mombyry jicuáivapeguârâ avei, opa umi Tûpâ Ñandeyára ojenôi jaguâichagua oyejeguarâ.
40. Upeicha ja jeta ñeê ambue rupi jae oicuaaucá jecópe ichupecuera omojângévo ichupecuera ja jeivo: Peñemboŷké cóvarejegua co iñâcâjâtâva reco vaígui.
41. Upei catu opa umi ogueroviáva iñeê oñemongaraíucá ja oime oñemboyuapŷ jetacue reje upe jaárape mbojapy mil ybypóra rupi.
42. Ja umiva oico tapiá umi Apostol cuera omboe jaguepe, ja oñomongueta jaguepe oñondive, ja oñepejaâ jaguepe mbuyape caraí ja oñemboe jaguepe.
43. Ja oico kyjŷyé guasu ipyapecuera yoa, ja jeta mbae guasu ja jechapyrâ oyeyapo umi Apostol rupi.
44. Ja opa umi oguerovia vaecue oi oñondive oñombaéva ramo.
45. Ja oñemû joga cuera reje ja jymbá cuera reje ja omboyao jepycue opavavépe oicôtevê jaichaguánte.
46. Ja oico tapia opa árape ipya pôrâ oñondive tûpâope ja oipejaâ jicuai mbuyapé caraí joga cuera rupi, ja ocaru oñondive torypápe ja ipya pôrâ oyoupecuera.
47. Ja ombotuvicha Tûpâ Ñandeyárape ja oyererojory opa umi tapicha cuera gui. Ja Ñandeyára omboyuapy opa árape iyatŷrape umi jemimbo jeco marangatu pe.