1. Upeyave Apolos oi aya Corintope, Pablo oicopá umi tetâ yvatevogua rupi ôguajê meve Efesope, ja upepe oyuju peteîva Cristo remimboecuerape, ja jei ichupecuera:
2. ¿Peipyjŷpa rae peê Espiritu Santope perovia rire? Ja jaecuera jei ichupe: ¿Mbaéicha nipo? Ore no rojendui yepe oimejá Espiritu Santo.
3. Ja jae jei: ¿Avá rérapépa, upeicharamo, peñemongarai racae? Ja jaecuera jei: Pe Juan Bautista rérape.
4. Ja jei Pablo: Pe Juan imongarai jaguepe oñemoñeê toñembo jecopyajú pyambyasyjápe oñemongarai jaguâ ja jei pe tetaŷguape oyeroviá jaguâ upe jaerire ou vaerâ reje, yaicuaa Jesús reje.
5. Ja ojenduma ramo upea, oñemongaraípa Ñandeyára Jesús rérape.
6. Ja omoîma ramo Pablo ipo jesecuera ogueyŷ pe Espiritu Santo ichupecuera.
7. Ja oñeê ambue ñeême ja oñemoñeê. Jetacue voi umi jicuaiva upepe doce cuimbae.
8. Ja upepe oiké pe tûpâope ja oñemoñeê oicovo okyjŷyé ŷ reje mbojapy yasy pucu cue oñemonguetáva ja ogueroviáucávo Tûpâ Ñandeyára reco marangatu rejegua gui.
9. Opaichavévonte oime oñembopyájâtâ vaecue ja ndogueroviasevái ja oñeê vaíva pe Tapé gui opava resape. Upeareje jae oyepea ichugui cuera ja oipea avei umi jemimboecuerape ja opa árape oñemoñeê pe oporomboejára Tiranno rogape.
10. Ja upeicha oyapo mocoî año peve ja upeicharupi opa umi oicova pe Asia retâme umi Judio ja Griego ojendu Ñandeyára Ñeê,
11. ja Tûpâ Ñandeyára oyapóucá mbaeguasu jechapyrâ imombeupyrâ Pablo po rupi.
12. Ja jetégui yepe oyererajá umi jasyvape cuera iñuâjá ja iyao pejengue ja upeicharupi oyei ichugui cuera imbaasy ja osê umi mbaepochy ichugui cuera.
13. Ja oime Judio ipayéva oico reí reíva oñejaâva ojenoî umi mbaepochy rerecojá ári pe Ñandeyára Jesús réra jeivo: Pojenoî Jesú rupi pe Pablo omojerâcuâva.
14. Ja oime siete cuimbae pe Judio pai ruvicha Sciva raŷcuera oyapo vaecue upeicha jicuai.
15. Ja oñeê pe mbaepochy ja jei ichupecuera: Jesúspe añete aicuaa ja ajechacuaa avei Pablope: ¿Peêcuerapa? ¿Avápa peêcuera?
16. Ja pe mbaepochy rerecojá oyapi jesecuera ja ipuaca jesecuera ja oyapyjy ichupecuera, ja upeagui jaecuera oñeguajê pe oga gui opívo ja oyecutúpá.
17. Ja oñemojerâcuâ upea umi Judio ja Griego jicuai vaecuepe Efesope, ja okyjŷyépá jicuai ja oñembotuvicha Ñandeyára Jesús réra.
18. Ja jeta umi ogueroviava ou oñemombeuvo ja oicuaáucávo jembiapo vaí cue.
19. Upeicha avei jeta umi oyapo vaecue payé ogueru icuatia ja ojapŷpá opava resape, (Ja oipapa ramo jepycue oyuju ojupity jague cincuenta mil mbaerepy).