1. Upegui ojasa ojovo Amfipolis ja Apolonia rupi ja ôguajê Tesalonicape. Upepe oime Judio tûpaô.
2. Ja Pablo oyepocuaavajáre oiké Jendápe cuera tûpâope, ja mbojapy sabado ára oñemongueta jendivecuera pe Santa Escritura gui,
3. oicuaaucá pôrâvo ja omoañetévo tecôtevê jague voi ojasa asy Cristo ja oicové yeby umi omano vaecue paûgui, ja co Jesús che amojerâcuâva peême (jei jae) jae Cristojá.
4. Ja oime jaecuerava ogueroviáva ja oyejeáva Pablo ja Silas reje, ja jetaite umi Griego iñemboecatúva avei ja umi cuña carai imbae pôrâva avei jeta.
5. Upevareje umi Judio jaecuerasénte gui oyocuai tecové reco rei reivape ja jecoŷvape ombyatypá jaguâ umi tecové reco reiva ambuecuepe omboaŷbu vaerâ pe tetâme, ja umiva oyapipa Jason roga ogueraja potávo ichupecuera pe tetaŷgua ñemonoôjápe.
6. Ja ndoyujui ramo ichupecuera ombosyryry Jasonpe ja peteîva jeŷicueravape umi mburuvicha rendape. Ja oguero sapucai jeivo: Coa cuimbae ombovapŷ vaecue co yby, anga ou coápe avei,
7. ja co Jason oguerojory ichupecuera. Opa coâva ombuai Cesar rembiapoucapy ja jei oimejá mburuvicha guasu ambue jérava Jesús.
8. Ja ojenduma ramo upea, pe tetâmegua ja umi mburuvicha ipya tarová.
9. Upeicharamo yepe, omeêma ramo iñeê pe Jason ja umi ambuecuecuera jeco pôrârâme, oyepoí ichuguicuera.
10. Ja upe pyjare vointe umi jeŷicuera omondo Pablo ja Silaspe Berea peve. Ja jaecuera ôguajê vove upepe oiké pe Judio tûpâope.
11. Umiva catu jeco pôrâiteveva umi Tesalónicape jicuai vaecue gui. Jaecuera voí oguerojory upe Ñeê kyreŷjápe ja oipea oyepobyby pe Santa Escritura pe opa árape ojecha jaguâ upeichapa umimbae?
12. Upevareje jeta jaecuerava oguerovia, jeta cuña cuera Griega mbae rerecojá ja jeta carai cuera.
13. Upegui oicuaama ramo umi Judio Tesalonicaŷgua oñemo jerâcuâ jague Ñandeyára Ñeê Pablo yuru rupi Bereape avei, umiva catu ojo upepe avei, ja omomyi ja omboaybu pe tetâŷguape.
14. Upemaramo umi jeŷícuera omondo Pablope ojo jaguâ ŷguasu cotŷvo. Silas ja Timoteo añónte opyta upepe.
15. Ja umi omoîrû vaecue Pablope ogueraja ichupe Atenas peve ja upegui ojenduma ramo pe jeiucáva Silas ja Timoteope ou jaguâ Jendápe pyae icatu jagueicha voi, jaecuera oyeby.
16. Uperire Pablo ojaarô aya jiconi Atenaspe oyepyapy ojecha ramo upe tetâ jenyjêmba taângá gui.
17. Upeichavo oñemongueta tûpâope umi Judio ja umi iñemboecatúva ndive ja pe oñeñemûjápe opa árape avei oñemongueta umi ôguajêva Jendápe ndive.
18. Ja oime iñarandúva umi Epicureo cuérava ja umi Estoico cuérava oñemonguetáva jendive. Ja oime jeiva: ¿Mbaépa jeise co iñeêngatúva? Ja oime ambuecue jeiva: Ñaimoa oñemoñeêjara umi pytagua tûpâ cuera gui (Upeicha jei omojerâcuâ jague reje pe Ñeê pyaju Evangeliopeguare pe Jesúsgui guare ja pe yaicove yeby jaguâ guare omano vaecue paûgui).
19. Ja oipyjy ichupe ja ogueraja ichupe pe Areopagope jeivo: ¿Ndicatuipa reicuaaucapa oreve co temimboe ipyajúva reñemonguetajá jina?
20. Ipyaju voi co roicuaaŷva co rerúva ore apysápe. Roicuaase mbaépa jeise coambae.
21. (Opa umi Atenasŷgua voí ja umi pytagua upepe jicuaiva ndoyapoi mbaeve ambue omombeúvo ja ojendúvo mbae ipyajúva mante.)
22. Upei catu Pablo oñemoí oñemboŷ pe Areopago mbytepe ja jei: Carai cuera, peê Atenasŷgua, che ajecha peêcuera peneñemboecatujá añete.
23. Coanga voi aguata aicovo ja amaê pene raânga roga cuera reje ayuju avei peteî taângá renda coa ñeê rejeve: Pe Tûpâ oyecuaaŷvape. Upe peêcuera pembuetéva peicuaaŷme, upévape che aicuaauca peême.
24. Pe Tûpâ voí oyapo vaecue co yby ja opambae ipype oimeva, Cova pe yvaga ja co yby Yara iñypyrumbŷ guive voi, Upeva ndoicoi tûpâo oyeyapo vaecue ñande po rupipe,
25. ja noñembuetéucái carai cuera po rupi, Jae oicôtevêvaicha mbae gui. Jae omeêva opavape tecove ja pytujê ja opa mbae.
26. Jae voi oyapo vaecue peteî tuguy gui peteîchante opavave ybypóra rejegua reŷicuera oico jaguâ oparupi ybyari ja yma guive voi omoingo ichupecuera jecové pucucue ja jetâ oico jaguâ tuvichacue,
27. icatu jaguâ ojeca Tûpâ Ñandeyárape icatu jaicha oyepobybyjápe oyuju Ichupe. Añete Jae vointe na imombyryi avave ñandejegui cuera.
28. Ipype voi ñande yaicove ja ñamyi ja ñane ñaime, jei jagueicha peteî umi pene arandu vaecue: Jeseguánte avei ñandecuera.
29. Upévareje Tûpâ Ñandeyára rejegua ramo ñande, anichene ñamboyoya Tûpâ Ñandeyára rejeguava peteî taângá oro terâ plata terâ itá guigua iyapopyré ybypóra catupyrŷcue ja aranducue rupi reje.
30. Añeté voí Tûpâ Ñandeyára ojechaguí oguero kîrîrî ramo yepe umi ymaguare itaby ramo guare, coanga catu omombeúucá opa umi ybypóra opa tetâmeguape toñembo jecópyajú jaguâ pyámbyasŷjápe,
31. omoîma járeje peteî ára omoñeê jaguâ jecópe umi ybypóra cuerape peteî caraí rupi Jae omoingo vaecue mburuvicha ramo, oyeroviáucávo opavape omoingove yeby jague reje pe Caraipe umi omano vaecue paûgui.
32. Upei catu jaecuera ojendú ramo oyee ramo oyeicové yeby jaguâ umi omano vaecue paûgui, oime peteîva oñembojoryva ja oime ambuecue jeiva: Torojendu yeby coambae gui ára ambuepe.
33. Upeicha osê Pablo iyapytegui cuera.
34. Oime voi cuimbae cuera oyejeava jese ja oyeroviava Cristo reje, umiva apytepe oime avei pe Dionisio pe Areopagoŷgua, ja peteî cuña caraí jérava Damaris ja oime ambuecue jendivecuera.