1. Upeyave oime ou peteîva Judeagui ja omboe vaecue jicuai umi jeŷícuerape jeivo: Peê peñemongarai ŷ ramo Moises oyapouca jagueicha, ndicatui peñembo jecomarangatu jecópe.
2. Upeicha oyuaby asŷ ramo ja oñojaâ ramo oñondive cuera Pablo ja Bernabe ja umi ambue cue, jiâ ichupecuera oñondive omondo jaguâ Pablo ja Bernabe ja peteiva umi ambuecue jeŷícueraguape Jerusalempe, ojo jaguâ umi Apostol ja umi carai ituyáva rendape cuera co âmbae oyuaby jague rejejápe.
3. Ja pe Iglesia Cristo rejegua cuérava omoîrû ichupecuera osênguévo, ja ojasávo Fenicia rupi ja Samaria rupi oicuaáucá oñemboyeré jagua umi pytagua ja upeicha tuvicha ombojorŷ umi jeŷícuerape.
4. Ja ôguajê vove Jerusalempe oguerojory ichupecuera umi pe Iglesia Cristo rejeguava ja umi Apostol ja umi carai ituyáva ja jaecuera omombeúpá opambae Tûpâ Ñandeyára oyapo vaecue jaerupi cuera.
5. Ja oime peteîva umi Fariseo rejeguáva Cristo rejeguáva opuâ ja jei tecôtevêjá oñemongaraíucá ichupecuera pe Moises ñeêngue rupi ja ombuayéucápá ichupecuera pe Moises ñeêngue jecópe.
6. Ja uperire oñembyatŷpá umi Apostol cuera ja umi carai ituyáva oicuaami jaguâ âmbae rejegua.
7. Ja oñejaâ aré rire oñondive cuera opuâ Pedro ja jei ichupecuera: Peê carai cuera, che reŷícuera, peêcuera peicuaa pôrâ aréma jague Tûpâ Ñandeyára Che poravó jague pende apytegui cuera ojendu jaguâ umi pytagua che yuru rupi co Ñeê Pyajú Evangelio peguare oguerovia jaguâ.
8. Ja Tûpâ Ñandeyára pe ojechacuaava ñande pyapy, oyejechacuaáucá ichupecuera omeê pype ichupecuera Espiritu Santo ñandeve guaréicha avei.
9. Ja Jae ndoiporoporavói ñande ja umiva apytepe omopôtí pype ipya cuera oyerovia jague rupi.
10. Coanga, upeicharamo, ¿maerâpa pembopochyse Tûpâ Ñandeyárape pemoî pype umi Cristo remimboe cuera atiŷ reje pe mbae ipojŷiva ñanderú ja ñande avei yepe nda yaropuacá jaguei.
11. Nda upeicha vaerâi voí. Ñande voí yarovia ñañembo jecómarangatu jaguâ Ñandeyára Jesús pya pôrâ ja pytyvô rupi jaecueraicha avei.
12. Uperire okîrîrîmba ja oyapysacá sacá Bernabe ja Pablo reje omombeu ramo umiva mbae guasu ja jechapyrâ Tûpâ Ñandeyára oyapo vaecue jaerupi cuera umi pytagua paûme.
13. Ja oñeêmbáma ramo okîrîrî, ja Jacobo oñeê ja jei: Carai cuera, che reŷícuera, pe cherendumi catu cheve.
14. Co Simon omombeupá ramô mbaeichapa Tûpâ Ñandeyára iñypyrumbŷpe oñandu rae umi pytaguápe oipea jaguâ ipaûgui cuera peteî atyra Jéra rejeguarâ.
15. Oyoyá voí umi ñemoñeêjara ymaguare ñeêngue pe Santa Escriturape oiva:
16. Coambae rire ayebyne ja amopuâ yeby pe David rogacue pe oñemboyaparó vaecue ja amyatyrône umi oñembyai jague ja amopuâ yebyne,
17. icatu jaguâ umi vbypóra rembyré ojeca Ñandeyárape ja opa umi pytagua oñembo jéra vaecue Che Rérape.
18. Upeicha jei Ñandeyára pe oyapóva opa mbae Jae oicuaá vaecue voi iñypyrumbŷ guive voí.
19. Upevareje che aimoâ naipôrâijá ñamuanguecói reí umi pytaguape umi oñemboyere râmô vaecuepe Tûpâ Ñandeyárape.
20. Tayaéucá mante ichupecuera anive jaguâ oyejea umi taângá rejeguava reje ja toyepea mbae tieŷ gui, ja ani jaguâ jou mbae yubŷpyré terâ tuguycue.
21. Oime voí ymaite guive yepe opa tetâme um oñemoñeêva Moises ñeêngue gui ja omoñeêva Moises cuatia itûpâope cuera opa sabado árape.
22. Uperamo oyuju pôrâ upeicha umi Apostol cuera ja umi carai ituyáva opa pe Iglesia Cristorejeguava ndive oiporavó jaguâ iyapytegui cuera cuimbae cuera omondo vaerâ Antioquiape Pablo ja Bernabe ndive, upe Judas jéra yoáva avei Barsabbas, ja Siláspe, carai cuera tuvichaitévéva jeŷícuera rejegua guive.
23. Ja jiâ ichupecuera oyapo cuatia ñeê omondo vaerâ ipo rupi jeíucájá: Umi Apostol cuera ja umi carai ituyáva ja umi ñande reŷícuera ore pomomaitéiucá peême, peê ore reŷícuera pytagua rejeguava Antioquia pegua ja Siria pegua ja Cilicia pegua.
24. Ore rojenduma rae oimejá peteîva ore rejeguacuérava, ndo ore remimondovái voí, pene muanguecóiva jicuai jemimboe rupi ja ombo tarovajá jina pende pya:
25. upévareje coanga jiâ oreve roñembyatyjápe roiporavó carai cuerape romondo vaerâ pene rendape ore rayjupára Bernabe ja Pablo ndive:
26. umiva voi carai cuera omoî vaecue jecové cuera Ñandeyára Jesu Cristo réra rejejápe.
27. Aiporamo romondo Judaspe ja Silaspe, ja jaecuera avei oicuaaucáne peême iyurueté rupi peteîcha.
28. Jiâ voi Espiritu Santope ja oreve avei ani jaguâ mbaeve ipojyiva oñemoî peême, umimbae tecôtevêvévante,
29. ani jaguâ peu soo oñecuameê vaecue ombuetéjápe taângá, ja ani jaguâ peu tuguy ja soo yubŷpyré guigua, ja ani jaguâ pende reco tieŷ. Upeicharamo peñeñangareco ramo umimbae gui peyapo pôrânerae jecópe. Ta peico pôrâ tamo.
30. Upei catu umi jemimondo cuera ojo Antioquiape ja ombyatypá umi jeŷícuerape ja omeê ichupecuera pe cuatia ñeê.
31. Ja umiva omoñeê ichupe ja oguerojorŷeté ja pe oyeéucá vaecue ipypeguare ombopyaguapŷ ichupecuera.
32. Ja Judas ja Silas avei, jaecuera avei oñemoñeêjara rejegua voi, oñemoñeê pucu avei ja upeicha ombopyáguapŷ jeŷícuerape, ja omombaraeté ichupecuera.
33. Ja oico aremi upepe, ja upei umi jeŷícuera omondo yeby ichupecuera ipya kîrîrîjápe umi imboújaré rendape.
34. Silaspe voí ipôrâ rae opyta upepe.
35. Ja Pablo ja Bernabe opyta aremive, ja jeta ambue cue cuera ndive oporomboe oicovo ja omojerâcuâ Ñandeyára Ñeê Pyaju Evangeliopeguare.
36. Upea jague mboby ára jápe Pablo jei Bernabépe: Yayebŷnte ñañandú ñande reŷícuerape opa umi tetâ ñamojerâcuâ jague rupi Ñandeyára Ñeê ja yajecha mbaéichapa jicuai.
37. Ja Bernabe oipota omoîrû ichupe cuera upe Juan jéra yoáva Marcospe.
38. Pablo voí oimoâ nda iyaí jaguâ omoîrû ichupecuera upe oyepea rei vaecue ichugui cuera Pamfilia gui ja ojose ŷ vaecue jendive cuera jembiapo jaguâme.
39. Ja upeicha oyuaby jicuai oyuejegui ja upeagui oyepea oyuejegui ja Bernabe ogueraja Marcospe jendive, ja ojo ŷguasu rupi Ciprope.
40. Ja Pablo oiporavó Silaspe ja jeŷícuera oñemboé Ñandeyárape oipytyvô jaguâ reje ichupecuera, ja upeicha jaecuera oyeói.
41. Ja ojasa oicovo Siria rupi ja Cilicia rupi ja omombaraetévo umi Iglesia Cristo rejegua cuéravape.