1. Ja oyeju upeicha avei Iconiope jaecuera oiké oñondive pe Judio tûpâope ja oñeê ogueroviáucá jaguâicha jetaite umi Judio ja umi Griego cuerape avei.
2. Upei catu umi Judio ogueroviase ŷ va omopuâ ombo pyávaí umi pytaguape umi jeŷícuera coty coty.
3. Opaichavévonte jiare jicuai upepe oñeêvo oyeroviajápe Ñandeyára reje ja okyjŷyé ŷ reje, ja Ñandeyára omoañete iñeê ipyapôrâ rejeguare oyapoucá pype mbae guasu ja jechapyrâ ipo rupi cuera.
4. Uperamo pe tetâmegua oñemboyao jicuai oyuejegui, oime peteîva oyava umi Judio reje ja oime ambuecue oyava umi Apostol cuera reje.
5. Ja oime opuâ Judio cuera ja umi pytagua juvicha cuera rejeve oyao jaguâicha ja oyapi jaguâicha itápe ichupecuera.
6. Upegui jaecuera ojechacuaa upea ja oyeói oñeguajêvo Listra ja Derbe ja umi tetâ Licaonia rejegua reje ja opa pe tetâ yere cue reje.
7. Ja upepe omojerâcuâ oicovo pe Ñeê Pyaju Evangeliopeguare.
8. Ja oime vaecue pe Listrape peteî cuimbae ipy apáva oguapŷ vaecue tapé yképe icarê vaecue isŷ rygue guive voí ja máramové ndoguata vaecuei.
9. Upeva ojendu oñeê ramo Pablo ja upéva omaê jese ja ojecha ramo jae oyeroviájá jese jesâi jaguâ,
10. jae jei jâtâ: Epuânte, eñemboŷ pôrâ nde py reje! Ja jae opo voí ja oguata jiconi.
11. Upei catu umi jicuaiva upepe ojecha ramo pe Pablo oyapo vaecue osapucai jeivo Licaonia ñeême: Umi Tûpâ cuera oyeyapo carai ramo ja ogueyŷ ñane rendape.
12. Ja ombojéra Bernabépe Jupiter ja Pablope Mercurio, jae pe oñemoneêva voí.
13. Ja pe paí pe Jupiter tûpâopegua pe oiva pe tetâ rovai, ogueru jymbá cuera ja yboty iñopêmbyré umi okê renondepe umi iyaty jicuaiva ndive ombuetévo ichupecuera mbae cuameêmbyré pype.
14. Ja ojenduma ramo umimbae, umi Apostol cuera Bernabe ja Pablo omondoro iyao cuera ja osê pyae umi oñembyatŷva apytepe cuera ja osapucai jeivo:
15. Peê cuimbae cuera ¿mbaerejépa peyapo cova? Ore nico cuimbae cuera peêichaguánte royú vaecue romojerâcuâvo peême co Ñeê Pyajú peyere jaguâ âmbae reí reí tabŷ gui pe Tûpâ Ñandeyára oicovéva rejeguarâ, Upe pe yvaga ja co yby ja ŷguasu ja opa ipype cuera oiva Apojare.
16. Umi ymaguarépe voi Jae ojechaguí opa tetâme oico jaguâ oguapé oicosé jagueichante.
17. Opaichavévonte Jae ndoyejeyai voínte oyecuaáucá ŷ reje iyupe oyapo pôrâ pype ja omonguŷ pype yvagui ja ombojiá pôrâ pype yvá pene mojyvâtâ jaguâicha peême tembiúpe ja pene mbobyá jaguâicha pende pyape.
18. Ja upeicha oñeê ramo yepe jasŷpe yepe oyoco umi iyatŷvape jicuai anichene jaguâ ombuete ichupecuera imbae cuâmeêmbŷre pype.
19. Upeguirire sapya ou upepe Judio cuera Antioquia ja Iconio gui ja omoâcâyere pe tetâmegua ja umíva oyapi itápe Pablope ja ôguenojê ichupe pe tetâgui ocape oimoâjápe omanómajá.
20. Ja umi jemimboe cuera oyerépá jese jicuai ja sapyaite jae opuâ ja oiké yeby pe tetâme. Ja pe ára ambuepe oyei Bernabe ndive Derbepe,
21. ja omojerâcuâ pe Ñeê Pyaju Evangeliopeguare pe tetâme ja ogueroviáucá jetápe jemimboe cuerarâ ja uperire oyeby Listrape ja Iconiope ja Antioquia pe,
22. ja uperupi ombopyaguasu oicovo umi jemimboecuerape omomanduávo ichupecuera oyerovia jâtâ jaguâ ja oicuaáucávo ichupecuera tecôtevéjá yajasa asy jeta yaiké jaguâ pe Tûpâ Ñandeyára reco marangatu yvapeguape.
23. Ja omoingo peteî teî Iglesiape jerecuárâ umi carai ituyá cuérava gui ja oñemboe rire ocaruŷreje oñangarecóucá Ñandeyárape jesecuera upe iyerovia jague yma guive guare voí.
24. Uperire ojasa Pisidia rupi ja ôguajê Pamfiliapeve,
25. ja pe Perga retâme ja oñemoñeê Ñandeyára Ñeê gui; ja upegui ojo Ataliape.
26. Ja upegui ojo ŷ rupi Antioquiape upe oñerero mandua jaguépe Tûpâ Ñandeyára oipytyvô jaguâ ichupecuera jembiaporâ upe coanga omomba ramôva.
27. Ja ôguajêma ramo ombyatŷ umi jeŷícuerape ja omombeu jeta mbaeguasu oyapo vaecue Tûpâ Ñandeyára jaerupi cuera ja Jae oipea jague okê iya jaguâ umi pytaguape avei oyerovia jaguâ Ñandeyárareje.
28. Ja upepe jaecuera opyta aré umi Cristo remimboe cuera ndive.