12. Upemaramo pe mburuvicha ojecha ramo pe oyeyapo vaecue, oguerovia ja oguerojory Ñandeyára oporomboéucá vaecue.
13. Upemaramo Pablo ja umi iñirûnguera oyeói Pafogui, ja oguajê Pergepe Pamfilia peguape. Upepe pe Juan oyepea ichugui cuera ja oyeby Jerusalempe.
14. Ja jaecuera ojasa Perga gui ôguajê meve Antioquia pe Siriapeguape ja oiké tûpâope peteî sabado árape ja oguapŷ.
15. Ja omoñeêmba ma ramo pe Moises cuatiacue ja umi oñemoñeêjára cuatia cue, pe tûpâo ruvicha omondo Jendápe cuera ja jeiúcá ichupecuera: Peê carai cuera, ore reŷicuera, pereco ramo peteî ñeêmi pemboe jaguâ umi jicuáivape coápe, peñeênte.
16. Upei catu Pablo opuâ oñemboŷ ja ojechauca ipo okîrîrî jaguâ ja jei: Peê cuimbae cuera, Israel cuérava, ja peêcuera pemboetéva Tûpâ Ñandeyárape, peyapysacánte!
17. Ñandeyára co ñaneretâ Tûpâ Ñandeyára oiporavó vaecue ñande rú cuerape ja ombotuvicha vaecue co tetâmegua oico ramo guare jaecuera pytaguaicha pe Egipto retâme, ja omopuâ iyŷva ja ôguenojê ichupecuera upegui.
18. Ja cuarenta años pucu cue yave oguero kîrîrî ichupecuera pe ñû oico ramo guare.
19. Ja ombuaipa rire siete tetâ pytagua rejegua pe Canaan ybypegua, omboyao iyŷbycue ichupe cuera imbaerâ ja upepe oico irundy cien años peve.
20. Uperire omeê ichupecuera mburuvicha cuerape upe Samuel pe oñemoñeêjara peve.
21. Ja uperamo oyerure mburuvicha guasu reje ja Tûpâ Ñandeyára omeê ichupecuera Saulo pe Cis raŷpe, cuimbae Benjamin rejeguava cuarenta años peve.
22. Ja omboí rire upévape ombojecovia ichupecuera mburuvicha guasu ramo Davidpe ja omojerâcuâ pôrâ jeivo: Ayuju cu David Jesse raŷ cuimbae che pya ipôrâichagua. Cóva oyapopáne Che rembipota.
23. Ja coâva rejegua gui voí Tûpâ Ñandeyára, oicuameê jagueicha, omopuâ Israel rejegua repŷjarâ, co Jesúspe.
24. Upe Juan voí oñemoñeê vaecue ou mboyve upéva, toñembyasŷnte opa umi Israel cuérava oñemongarai jaguâ.
25. Ja omombátama ramo upe Juan jembiapo, jei: ¿Avápa peimoâ peê chejá? Che ndajaei upéva. Coina ape ou che rire peteî ipŷrejegua yepe nda iyái cheve che ayorávo.
26. Peê cuimbae cuera, che reŷícuerava, Abraam rejeguava, ja opa peêcuera pemboetéva Tûpâ Ñandeyárape, ñandeve nico oñembou vaecue co ñeê ñanembo jecomarangatújarâ.
27. Ja umi oico vaecue Jerusalempe ja juvicha cuera ndojechacuaai Ichupe, ja upeicha oyapo oñeê jagueicha umi oñemoñeêjara umi cuatiápe omoñeêva opa sabado árape, ja omoí vaí Ichupe.
28. Ja oyuju ŷ ramo yepe icatu jaguâ oyucáucá Ichupe, oyerure Pilatope jese oyuca jaguâ Ichupe.
29. Ja oyeyapopá ma ramo opa umimbae pe Santa Escriturape oyee vaecue Ichugui, ombogueyŷ Ichupe pe ybyrágui ja omoî Ichupé pe itacuápe.
30. Upegui Tûpâ Ñandeyára omoingove yeby Ichupe umi omano vaecue paûgui.