1. Upevareje yajeyante umi mbae iñypyrumby guare Cristo Ñeê gui guare ja coágui rire yaguata tenonde pe teco cacuaavaicha rejegua peve, ja ani yaico umi ombojapo yeby yeby vaicha ñane mandua yeby yebyvo pe yayepyapy jague reje umi tembiapo reongue gui, ja pe yayerovia ypy jague reje Tûpâ Ñandeyára reje,
2. ja pe temimboe ñemongaraíjá rejegua reje, ja pe ñe po moîjá rejegua reje, ja pe omano vaecue oicove yebyjá rejegua reje, ja pe oñembo jecovia jaguâ ára upe ipajaiteva rejegua reje.
3. Ja upeicha voi yayapone omboiya ramo ñandeve Tûpâ Ñandeyára.
4. Oime ramo umi jecopete oyejesapé vaecue, ja ojaâ vaecue pe mbae pôrâ meêmbyré yvaguigua, ja oñemoingo vaecue Espiritu Santo rejegua ramo,
5. ja ojechacuaa vaecue ipôrâjá Tûpâ Ñandeyára jeíva, ja tuvicha vichajá umi mbae guasu ipuacaiteva pe teco yvapegua oico vaerâ rejegua,
6. sapya umiva oyeyaby rire, ndaiyai ichupecuera oñembopyaju tapia jaguâ jina oyepyapy yeby jaguâ: jaecuera oyejegui voi nte omoî pyaju yeby jicuai curusu reje Tûpâ Ñandeyára Raŷpe, ja omomârâucá Ichupe jicuai.
7. Oime ramo voi yby oipytéva pe ama tapia ouva jiari, ja omojeñoiva pojâ caavó pôrâ, ipôrâ vaerâ umi yby myatyrôucájaré peguârâ avei, upeva catu oñemo mbaepôrâ avei Tûpâ Ñandeyára pyapôrâ gui.
8. Ja oime ramo yby omongacuaava ñûatî ja capii atînte, naipôrâi marave ja mbae iroyrômbyrâ nunga vaicha ja ipajápe oyejapypáne.
9. Coanga, che rayjúpára cuera, añeê ramo yepe coicha rojaârô yeroviajápe, ipôrâve vaerâjá pendereco, ja pejupity vaerâjá peñembo jecomarangatuite jaguâ.
10. Tûpâ Ñandeyára voi ndoyapoi jecoŷme jesarai jaguâicha pene rembiapo gui, ja peê pejechaucájá pejayjújá jéra peêcuera peipytyvô ramo guare umi imarangatúvape, ja peipytyvôpe gueteri ichupecuera.
11. Ore pya yerure opavave peêva pene kyreŷ jaguâ tapia guaicha, icatu jaguâ pebya jecoitepe pejaârôjápe ipajápeve.