1. Upeicharamo yareco pype ñande yerecuévopa peteî araícha co ñande rechajáraeta ñamombo ñande yejegui opambae ipojyiva, ja pe angaipa ñandepŷcuáséva, ja ta ñañaní puaca ja kîrîrîjáme co tape opytava ñane renondepe ñañejaâ jaguâme gueteri,
2. ñamaña pype Jesu rejente co ñande ruvicha ñande yeroviajá rejegua ñanemo marangatu vaerâ jecope ipajápeve. Upeva pe jory ou vaerâ gui Ichupe, oguerokîrîrî pe curusu ogueroŷrô umi mbae motijarâ, ja uperire oguapy Tûpâ Ñandeyára renda acatuape.
3. Upeicharamo peêcuera anichene jaguâ pende pya cangy ja pende pyupá, pemboyoyami pe pejasa asyjá umi Jae ojasa asy jague reje, Jae ogueropuaca ramo guare umi angaipavora omoî vaí vaecue Ichupe.
4. Pene ñorayrôme angaipa coty coty peê nda peropuacai gueteri tuguy oñojê meve.
5. Sapya peêcuera penderesaraine rae umi ñeê ñanembo pyaguapyjarâ gui oñemeê vaecue peême tayra peguaicha: Che raŷ ani rereco mbaeve ramo co Tûpâ Ñandeyára nde yopy ramo, ja ani nde pyupá reñemotî ramo Jaerupi.
6. Oime ramo Ñandeyára ojayjúva, upévape Jae oyopy, ja oime ramo Jae ojechacuaava, upévape Jae oinûpâ.
7. Peropuaca voi peina co peyeyopŷjápe pende reco pôrâ jaguâ. Tûpâ Ñandeyára voi pende rereco voi itayra raicha. ¿Ja mbae tayrapa oime ituva oyopy ŷ va jecopôrâ jaguâ?
8. Ja peêcuera peico ramo peyeyopy ŷ reje, iyájaicha opa tayra jaetévape, aiporamo tayra ocara peê, nda tayraetei peê.
9. Upeva reje ñande ru ybyarigua ñande rereco yeyopŷ, ja upeicharamo ñande ñambuaye ichupecuera. ¿Upeicha avei naipôrâichepane yayeyocove ñane anga Ru pe icatu jaguâ yaicovété?
10. Jaecuera añetejápe ñande rereco iyopyjápe mbykymínte jiâ jaichante ichupecuera. Jae voi oyapo ipôrâ jaguâ ñandevente, ñande yajupity jaguâ jeco marangatujápe.
11. Añete ñande yopy yave ñañandu na mbae ñanembojoryjarâchai, jasy ja ñanemombuasyjarântejá. Uperire oico upeacue guinte voi umi oñembo aracuaáucá vaecue co oyeyopŷjápe oñembopya guapypa jaguâ, ja oñembo jecopôrâ jaguâ.
12. Upeareje pemombaraete pende yŷva oñesaingóva ja penerenypya ipyupáva;
13. ja peicârêó umi tape pepyru jaguâ, icatu ŷ jaguâ pe icarêva oyabypáite oñemyatyrô jaguânte pe ipârîjá.
14. Peñejaâ peico pôrâ opava ndive peyuaby ŷ reje, ja peñejaâ peñemomarangatu. Upeicha ŷ ramo ndicatu moai yajecha Ñandeyárape.
15. Pemaña pôrâke anichene jaguâ avave joa osyryryvo Tûpâ Ñandeyára pyapôrâ gui ja anichene jaguâ oyeju pende apytepe caavó iróva rapóicha pene muanguecoijarâ, ja omonguŷá jarâ avei ñande reŷi cuera ambuecue jetavape.
16. Pemaña anichene jaguâ oico pende apytepe itieŷva terâ itabŷva pe Esauicha pe oñemu vaecue peteî ñaembe tembiu reje icuatia iyŷpycue rejegua.