2. Ta pende rerojory ja penembo pyaguapy peême Tûpâ ñande Rú ja Ñandeyára Jesu Cristo.
3. Che che rory Tûpâ Ñandeyára ndive che che mandua vove pende reje,
4. ja tapia añemboejápe meme ayerure aina pende reje añemboe torypape,
5. peêcuera voi che moîrû vaecue co Evangeliope iñypyrujá ára guive coangaite peve.
6. Che arovia yeroviajápe upe omoñypyrújaré pende pyape co tembiapo pôrâ omombá jaguâ jecope Jesu Cristo ára guârâ.
7. Jecope voi che mandua che coicha opa pendereje poguereco járeje che pyape tapia che ñapytîjárupi voi, ja upeicha avei añejaâ pype aina añeê pe Evangelio reje amoañetévo peê che moîrûva co tembiapo pôrâme.
8. Tûpâ Ñandeyára voi oicuaa pôrâ che pojayjújá opavavépe peême Jesu Cristo pya rupi voicha.
9. Upeicha avei añemboe pende reje pende poraŷjueté etevé jaguâ ja penembaecuaa yoa yoa jaguâ ja pene mbaerechacuaa yoa yoa jaguâ jecope,
10. pejechacuaa pôrâ jaguâ jecópe mbae oicoeva, pende reco yopará-ŷ-jaguâ ja pemoñepysanga ŷ jaguâ avavepe, Cristo ára ramo guârâicha,
11. ja pende reco pôrâite jaguâ peico jaguâ yvá jiá jetavaicha Jesu Cristo rupi oyererojory ja oñemombeu guasu jaguâ Tûpâ Ñandeyára.
12. Ja che aipota, che reŷicuera, peicuaa umi mbae oyeju vaecue cheve osê jaguâ jetave meme oñemo mbaeguasu pe Evangelio.
13. Upeicha vaecue oyecuaapá umi pe mburuvicha guasu roga rupi guape, ja opa umi ambuecuepe avei co che ñapytîjá Cristo rejejápe voi.
14. Ja upegui jeta umi ñande reŷicuera Ñandeyára rejeguava oñembo pyaguasúvo añeñapytîjá reje che ojaâvé oñeê kyjŷyé ŷ reje pe Tûpâ Ñandeyára Ñeê.
15. Oime yepe peteîva oñemoñeêva Cristo gui jacateŷgui umi ambuecue reje, ja oyuabyse guinte, oime ambuecue oñemoñeêva jecope ikyreŷ pôrâ gui avei.
16. Umiva voi oñemoñeê che raŷjujáreje oicuaa pype che añemoî jague coápe añeê jaguâ rejejápe co Evangelio rejejápe.
17. Umi ambuecue oñemoñeê Cristo gui oyuabyse járeje, ja nda ipya apyte guivei, oimoavo omboyuapy jaguâ che pyapy vaerâ añeñapytîjápe.
18. ¿Mbaepa upeicharamo? Marave ndoicoi! Ipôrâite opaichavevo guaujápe terâ añetejápe Cristo oñemojerâcuâ ramo, ja cova reje voi che abyá ja abyáne yepe.
19. Aicuaa voi cova joa vaerâjá cheve che mârâ ŷ jaguâ pene ñemboe rupi, ja Jesu Cristo Espiritu che pytyvôjá reje,
20. che pya oyerure jaicha, ja ajaârôjaicha anichene jaguâ mbaevepe añemotî, icatu jaguânte ayeroviaitegui tapia guaicha, coanga upeicha avei Cristo oñembo tuvicha jaguâ che recope che retepe aicove terâ amano ramo yepe.
21. Cheve voi che aicovéjá Cristo, ja che amanojá che mombaererecojarâ.