1. Che, Simon Pedro, Jesu Cristo rembiguai ja rembiyocuai, Apostol, jaéucá opa umi ojupity vaecue oreicha voi avei co mbae ipôrâiteva yayeroviajá ñane Tûpâ Ñandeyára ja Ñane mopôtíjára Jesu Cristo reco pôrâ yoyaite rupi.
2. Ta pende pyapôrâ ja pende pyaguapy yoa yoa peicuaa pôrâvo jecope Tûpâ Ñandeyárape ja Jesu Ñandeyárape.
3. Jae ipuaca rupi Ñandeyárajá reje, omeê ñandeve opambae iyáva yaicove pôrâ jaguâ ja ñambuete jaguâ jecópe Ñandeyárape ñande yaicuaama guive upe ñane renôijarépe ituvichacue ja jeco pôrângue rupi.
4. Umimbae rupi voi Jae omeê ñandeve jemi cuameêmbyre ipôrâitéva ja tuvichaitéva, icatu jaguâ umimbae rupi peñemoingo jaguâ Ñandeyára reco pegua rejegua ramo, peêcuera peñeguajê jague reje pe teco tayasu gui umi ybypóra jecovaísejápe.
5. Co vaerâ vointe peñejaâ, icatu jagueicha, ja peyerovia yaveve ta pende reco pôrâite, ja pende reco pôrâite yaveve tapende reco arandu,
6. ja pene arandu yaveve ta pene âcâguapy, ja pene âcâguapy yaveve ta peropuaca kîrîrîjáme, ja perokîrîrî yaveve ta pembuete jecope Ñandeyárape,
7. ja pembuete yaveve jecope Ñandeyárape ta peyojayju oyoupe, ja peyojayju yaveve oyoupe ta pejayju upeicha avei opavave pe.
8. Upeicharamo pende reco pôrâ ramo upeicha, ja ipôrâ oyoa yoave ramo peêcuera peicone na iñateîvaichai, ja nda tecove rei rei vaichai ja pejupityne peicuaa pôrâ meve jecope Ñandeyára Jesu Cristope.
9. Oime ramo voi cuimbae upeichagua reco-ŷ-va, upeva jesapysoŷva, ja ojecha anguiva, jesaraima jague reje oñemopôtíma jague iñangaipa ymaguaregui.
10. Upevareje, che reŷicuera, peñejaâ icatu jagueicha pemoañetetévo Ñandeyára penerenôi ja pende poravó jague peême, ja peyapo aya yaveve âmbae na peñepysangaichene marove.
11. Upeicharamo oyejupitŷucáne catuetei peême peike jaguâ pe Ñandeyára ja Jesu Cristo Ñanemopôtíjára renda yvapegua tapia guarâme.
12. Upevareje añejaâne tapia pomomandua jaguâ peême umi mbae gui, peicuaa pôrâ voi ramo yepe, ja peêcuera pepyta jâtâ ramo yepe pe Ñandeyára Ñeê añetegua perecóvape voi.
13. Cheve voi jiâite jecopeguajá aico aya che co aicojápe pomokyreŷ jaguâ pomomandua pype umichagua mbae reje.
14. Che aicuaa voi mbykymajá ára cheve ayepea jaguâ co che aicojá gui, ojechauca jagueicha voi cheve Ñandeyára Jesu Cristo.
15. Upeicharamo che añejaâne iya ramo cheve pomomanduáucá peême umimbae gui che aja rire yepe ramo guârâ.
16. Ore ndajaei umi iñarandu guaúva rapycueri ojo vaecueicha roicuaauca ramo guare peême pe Ñandeyára Jesu Cristo ipuaca vaerâjá pe ou yeby jaguâ árape. Ore voi rojecha vaecue ore resá rupi voi ituvichaitecue.
17. Jae ojupity voi oñembueté ja oñembotuvicha jaguâ Tûpâ Ñandeyára Túva gui, ja pe oñembotuvichajá yvapegua ojesapéva apytegui ojupity Ichupe upe ñeê: Cova Che Raŷ ajayjúetéva, Che arojoryja.
18. Ore voi rojendu coa ñeê ouva yvaguive ore roime ramo guare Jendive pe itá atŷra imarangatúva ári;
19. ja oime upe ñeê gui voi jâtâve opyta pe ñeê yarecóva umi ñemoñeêjaré ymaguare cuatiapegua, ja peêcuera mo peyapo pôrâ pemaê pype upe ñeê reje tataendŷ ojesapévaicha pytûjápe coê meve ára ja osê meve pe coê rerujá pende pyape.
20. Peêcuera peicuaa raê vaerâ mbaeveichagua ñeê oñemoñeê jague pe Santa Escriturape guare oico jague mbaeveichagua oñemoñeejáragui oyora vaecue oyejegui vointe:
21. mbaaeveichagua ñemoñeê ymaguare noñemoingoi cuimbae rei rembipota gui, cuimbae cuera Tûpâ Ñandeyára rembiyocuai cuera voi oñeê vaecue oñeñatôi jague gui Espiritu Santo rupi.