1. Che Pablo, Jesu Cristo rembiyocuai, Apostol, che moingo vaecue upearâ Tûpâ Ñandeyára ñane mbojeco marangatu jára, ja Cristo Jesús ñande yeroviajá,
2. romo maitéiucá ndeve, Timoteo, che raŷ ete co yayeroviáva rejeguáva. Tûpâ ñande Rú ja Cristo Jesús Ñandeyára ta nembopyapôrâ ja nde poriajuvereco ja ta nembopya guapŷ.
3. Che aime ramo guare aja jaguâicha Macedoniape, che ayerure ndeve repyta jaguâ Efesope, icatu jaguâ remomandua umi ambuecuepe ani jaguâ omombia iporomboepe,
4. ja ani oyapysaca mbae rei rei reje ja umi ñemonaré iyapyra-ŷ-va reje. Umimbae voi ñande poromboyuabŷva ñane mboyepocuaa rendaguepe Tûpâ Ñandeyára rembiapo rerecua ramo icatujápe yaico ñande yayeroviajá rupinte. Upevareje coanga ayerure yeby ndeve.
5. Co vaerâ voi ore romomandua oico vaerâjá mborayju ipya pôtí rejeve ja ipyapy pôrâ rejeve ja oyoyerovia oyueje guauŷjápe.
6. Co âmbae pôrâ gui oime oyaby vaecue ja opia vaecue ñeê tabŷ apytepe.
7. Umiva oyeyapose poromboejára, ndojechacuaai ramo yepe iñeêngue jaecuera voi jei vaecue, terâ umi mbae jaecuera voi omoañetéva.
8. Ñande yaicuaa voi pe ñeê ñande reco rejeguarâ ipôrâjá, ñande yaico ramo ipype jecópe yaico jaguâicha.
9. Yaicuaa pôrâ voi pe ñeê jecopegua ndoicoijá pe jeco pôrâva reje, umi jecoŷmegua rejente, ja umi iyuru âtâva reje, ja umi oñemboeseŷva reje, ja umi angaipavóra reje, ja umi iñañáva reje, ja umi itayasúva reje, umi isŷ ja itúva nûpâjaré reje, ja umi oporo yucajaré reje,
10. ja umi oñembotieŷva reje, ja umi oyopyjŷva cuimbaepe reje, ja umi omondava cuimbaepe reje, ja umi iyapúva reje, ja umi oporomoî vaíva reje, ja oime ramo mbae na ore remimboecue imarangatu jecopegua rejeguaichaguai, pe ñeê jecopegua oico umi mbae reje,
11. ja oime ramo mbae na Tûpâ Ñandeyára pe imbuetepyrâ ja imarangatúetéva Evangelio rejeguaichaguai co Evangelio oyeyeroviáucá vaecue cheve.
12. Arojory upe che mombaraetéjára, Cristo Jesús voî Ñandeyárape, Jae che rereco jague reje yeroviajá ramo, ja Jae che moingo jague reje co tembiapo rerecuá ramo,
13. aico rire yepe yma voi aporomoî vaívo ja aporo moñávo ja aporoaóvo. Opaichavévonte Tûpâ Ñandeyára che poriajuvereco vaecue che ayapo jague reje umi mbae aicuaa-ŷ-reje ja ayeroviá-ŷ-me,
14. ja Ñandeyára pya pôrângue che atôi yoa yoa cheve ogueroviáucávo ja ojayjúucávo cheve Cristo Jesús rejeguájarâ.
15. Cova ñeê yeroviapyrâ ja iyáva opavave oyopyjy jaguâ Cristo Jesús ou jague yby ári ombojeco marangatu jaguâ umi angaipavórape. Umiva cuérava che voi pe tenondéva, che voí che pojyieté vaecue.
16. Ja coa reje voí che poriajuverecó cheve Tûpâ Ñandeyára icatu jaguâ che pype raê ojechaucá Cristo Jesús tuvicha jague oguerokîrîrî cheve ojechacuaáucá jaguâ umi ambuecue oyerovia vaerâme Jesé pe Tecove iyapyra-ŷ-va rejeguarâ.
17. Coanga toñembueté ja toñembotuvichaité tapia guârâ pe Mburuvicha Guasu, Tapiagua, Omano-ŷ-vaerâ, ja Yajecha-ŷ-va, Jaeñónteva Tûpâ Ñandeyáraite. Amen.
18. Coambae voi che romomandua vaerâ ndeve, che raŷ Timoteo, oñemombeu jagueicha cheve ndejegui yma icatu jaguâ coicha rerayrô pe ñorayrô pôrâjáme,
19. reicopype nde yerovia jápe ja pya pôtíme. Oime ambuecue ogueroyrô vaecue umimbae ja upeicha ocañŷ iyerovia jague gui.
20. Umiva rejegua voi oime pe Himeneo ja Alejandro, che ameê vaecue Satanas mbaepochŷpope jaecuera oñembo aracuaa jaguâ na ipôrâijá oporoaó.