11. toyepea mbae vaí gui: toyapo ipôrâva, tojeca oyeico pôrâjá renda, ja toñejaâ upearâ.
12. Ñandeyára voi oyesareco umi jecopegua reje, ja oyapysaca jina imbae yerure cuerareje. Ñandeyára voi oñembojováâtâ umi jembiapo vaíva coty coty.
13. ¿Ja mávapa penemomârâne peême, peêcuera pene râcâteŷ ramo mbae ipôrâva reje.
14. Sapya peêcuera pejasá asŷ ramo pende reco pôrâjá reje, pende reco ory vaerâ. Ani pekyjŷye umi pene monguyjŷyéséva gui, ja ani peyepyapy.
15. Pembueténte Cristope Ñandeyára ramo pende pyape, ja peñembosacoí tapia pembojovai jaguâicha oimerâeva oporandúvape peême penemoñeêsévo pe pejaârô vaerâ gui pende pyape pende yeroviajá guivo, mbegue catunte peñeê ja yepoŷjujápe.
16. Ta pende pyapy pôrânte, ja iyojeipyre, peñemoi vaí rei ramo guârâ icatu jaguâ umi penemombóiva jicuai oñemotî jaguâ pende reco pôrângue Cristo rejegua jáguigua rupi.
17. Ipôrâve voi, oipotama guive Tûpâ Ñandeyára, yajasa asy yayapo pôrâjá reje yayapo vaíjá reje gui.
18. Cristo avei yepe peteî yeby omano ñane angaipa reje, Jae pe jecoitepeguáva umi jecopegua-ŷ-rejejape, icatu jaguâ ñande reraja jaguâ Tûpâ Ñandeyárape. Jae omano vaecue jete guivo ja oñemoingové yeby pe Espiritu guivo.
19. Upe Espiritu rupi voi avei Jae ojo ja oñemoñeê umi anga yepe jicuai vaecue iñapytîjápe pytûnguŷpe,
20. umi yma voi iñeêrendú-ŷ-vaecue, ojaârô aya Tûpâ Ñandeyára oguerokîrîrîjáme umi ára Noe omopuâ ramo guare jina pe mbayru guasu upe oyupi jague mbobymi ocho ybypóra cuerante oyeyeraja vaecue mârâŷreje upe ŷ tŷguasúva gui.
21. Upéva voi pe ñande caraíjá yoguajá upe ñañe momarangatúucájá coanga, na oñemboíjá rejéi ñande rete kyacue, ñande pyapy pôtí apyte pôrâ guinte ñande ajôjá reje Tûpâ Ñandeyára reje. Upeicha co ñande caraíjá ñane momarangatúucá Jesu Cristo oicove yeby jague reje,
22. upe voi ojo vaecue yvape ja oiva jina Tûpâ Ñandeyára acatuape ja umi yvapegua cuérava yoa ja mburuvicha guasu ja ipuacaiteva oyeyocóucá ipo guype.