1. Oime ramo ogueroviava Jesus Cristojá, upéva Tûpâ Ñandeyára ñemoñaré rejegua, ja oime ramo ojayjúva pe Túva oporomo ñemoñávape ojayju avei pe oñemoñarépe Ichugui.
2. Coichavo yaicuaa yajayjújá Tûpâ Ñandeyára rejegua cuerape, yajayju ramo Tûpâ Ñandeyárape, ja yayapo ramo jembiapoucapŷ.
3. Cova ñande rayjújá Tûpâ Ñandeyárape ñambuayépe jembiapoucapŷ, ja jembiapoucapŷ voí nda ipojŷietévái.
4. Oime ramo Tûpâ Ñandeyára ñemoñaréva, upéva ipuaca co yby reco rejeve, ja co mbae ipuacaetéva ñande puaca jaguâ co yby reco rejeve, upéva ñande yeroviajá.
5. Upeicharamo ¿mávapa pe ipuacáva co yby reco rejeve? Upe ogueroviáva Jesu Cristo Tûpâ Ñandeyára Raŷetéjá.
6. Jesu Cristo voi jae pe ou vaecue ŷ ja tuguŷ rejeve, nda ŷ rejeve añói, pe ŷ ja tuguŷ rejeve avei:
7. ja pe Espiritu pe oicuaáucájá umimbae gui pe Espiritu añetegua rerecuájá reje.
8. Mbojapy voi oime umi oicuaáucájára, pe Espiritu, ja pe ŷ, ja pe tuguŷ, ja coa mbojapy peteîchante.
9. Yarovia ramo umi cuimbae rembicuaáucápŷ, Tûpâ Ñandeyára rembicuaáucápŷ tuvicháve umiagui. Ja cova voi Tûpâ Ñandeyára rembicuaáucápŷ, umi mbae Jae omojerâcuâuca vaecue Taŷra gui guare.
10. Upe oyeroviáva Tûpâ Ñandeyára Raŷ reje, upéva oguerecoma voi ipyápe Ñandeyára rembicuaaucapŷ. Oime ramo ou oguerovia-ŷ-va Tûpâ Ñandeyárape upéva oyapo Ichupe iyapúva ramo, ndo gueroviai jague reje pe Tûpâ Ñandeyára rembicuaáucápŷ Jae omojerâcuâuca vaecue Taŷra gui guare.
11. Cova pe Ñandeyára rembicuaáucápŷ Tûpâ Ñandeyára omeê jague ñandeve tecove iyapyra-ŷ-va ja co tecové oico pe Taŷra pype.
12. Upeicharamo upe oguerecova pe Taŷrape oguereco pe tecové, ja pe oguerecó-ŷ-va Tûpâ Ñandeyára Raŷpe ndoguerecoi pe tecove.
13. Coambae che jaéucá peême co cuatia ñeê rupi peicuaa jaguâ perecomajá pe tecové iyapyra-ŷ-va peêcuera peyeroviáva Tûpâ Ñandeyára Ray réra reje.
14. Upeagui yayerovia tuvichaite Jese yayepoyjú-ŷ-reje. Oime ramo mbae yayerurejá Ichupe jembipota rupi voi Jae ñane rendu,
15. ja yaicuaa guive Jae ñane rendujá jina, aiporamo, oimeraêva mbae yayerure jaichagua Ichupe yaicuaa yajupitŷmajá ñane mbaeyeruré yayerure jague.
16. Oime ramo peteî ojecháva japichápe oyapo ramo angaipa ndajaeiva omano jaguâicha, oyerure vaerâ Ichupe, ja Jae omeêne ichupe jecove umi oyapo-ŷ-vaecue angaipa omano jaguâicha. Oime voi angaipa oñemano jaguâva ndaei toyerure upeichagua angaipa reje.
17. Opambae jecopegua-ŷ angaipa voi. Oime angaipa ndajaeiva ñamano jaguâ.
18. Yaicuaa pôrâ oime ramo Tûpâ Ñandeyára ñemoñaré rejeguava, upéva ndoicováijá angaipápe. Upe Tûpâ Ñandeyára ñemoñaré oñangareco jese, ja pe mbaepochy ndicatui opoco jese.
19. Yaicuaa voi ñande Tûpâ Ñandeyára rejeguajá ñande, ja opa co ybyrejegua opytajá pe mbaepochy poguŷpe.
20. Yaicuaa voi Tûpâ Ñandeyára Raŷ ou jague ja omeéjá ñandeve ñane âcâ pôrâ jaguâ yaicuaá jaguâ pe Jaetévape, ja ñande pe Jaetéva rejegua pe Ñandeyára Taŷra Jesu Cristo rejegua voi. Jae voi pe Tûpâ Ñandeyára Jaetéva ja pe Tecove iyapyra-ŷ-va.
21. Che raŷcueramimi, peñeñangareco umi mbae rei raângá gui.