1. Coanga ñañemonguetá umi mbae pende cuatia ñeême peporandúucá jague cheve gui. Ipôrâ cuimbaepe anichene jaguâ opoco cuña reje.
2. Opaichavévo umi tieŷ oicova gui, peteî teîva toguerecónte oguembireco ja peteî teîva cuña toguerecónte omena.
3. Upeichape pe imena ta ipyapôrâ jecope jembireco ndive, ja upeicha avei pe jembireco imena ndive.
4. Pe cuña ndoguerecoi oguete ipoguype, imenante oguereco, upeicha avei pe imena ndo guerecoi oguete ipoguype jembireco mante.
5. Ani peyojeyá rei oyuejegui, icatu mboby ára pevente ja peipota yoya jaichante oñondive, iya jaguâ peême peñemboe jaguâ ja uperire peyejea yebyne oyueje, anichene jaguâ pe mbaepochy pene reroña pende pituá rupi.
6. Covante che jae peême iyajá reje peême voi, cóva ndajaei che rembiapoucapy pende recorâ.
7. Che voí jaénte icatu tamo opa cuimbae cuera chéicha. Peteî teîva ñandeva yareco Tûpâ Ñandeyára gui ñande recorâ, peteî añetejápe coicha, ja pe ambue amóicha.
8. Upeicharamo yepe che jaéucá umi omendaŷvape ja umi imena omano vaecuepe ipôrâ vaerâjá ichupecuera opyta ramo chéicha,
9. ja icatu-ŷ-ramo oyeyoco, tomendante. Ipôrâve voi ñamendá ramo ja ani ñande jacúpá.
10. Ja umi omenda vaecuepe oyueje che aicuaauca, nda chei voí Ñandeyárante oicuaauca, pe cuña anichene oyepea jaguâ imena gui.
11. Ja sapya oyepea ramo topyta menda-ŷ-reje, terâ toñyrô imenape ja pe imena anichene jaguâ opoí jembirecógui.
12. Ja umi ambuecuepe jaéucá, chénte voí na Ñandeyárai, oime ramo ñande rejegua oguerecova jembireco ogueroviaŷva ja pe cuña oyuju pôrâ ramo oicove jaguâ jendive, anichene opoí ichugui.
13. Ja oime ramo cuña oguerecova imena ogueroviaŷvape ja upéva obya ramo oico jaguâ jendive, anichene opoi pe cuimbaegui.
14. Ja pe imena ogueroviaŷva oñemo marangatu jembireco rupi ja pe jembireco ogueroviaŷva oñemo marangatu pe carai ñande reŷiva rupi. Upeicha ŷ ramo, pende raycuera oico vaerâ ñemingue ramo. Coanga upeichape oico imarangatúva ramo.
15. Ja pe ogueroviaŷva oyepea ramo, toyepeante. Upeichape pe cuimbae ñandéva terâ pe cuña ñandéva, ndajaei iyocuaipyrâ catuetei coambaeicha ramo. Tûpâ Ñandeyára voí ñanerenoî ñandeve yaico jaguâ pyaguapŷpénte.
16. ¿Mbaéichapa icatune reicuaa, nde cuña carai, icatútapa reñemo marangatúucá ne menape, terâpa mbaeichapa icatune reicuaa, nde carai omendava, icatutapa reñemo marangatúucá ne rembirecope.
17. Upeicharamo yepe, peteî teîme jeco râicha omeê jagueicha ichupecuera Ñandeyára, ja Tûpâ Ñandeyára ojenoî jagueicha peteî teîme, upeicha toico ja upeicha che amoingo ja ayapoucá opa tûpâope.
18. ¿Oimépa petei icarai vaecue Judiorâ oñejenoi ramo guare? Ani opoí pe jeco cue gui. ¿Oimépa peteî Judio ñemongarai-ŷ-vaecue oñejenoî ramo guare? ani oñemongaraí Judiorâ.
19. Pe Judio ñemongaraíjá ndajaei mbaeve, ja pe Judio ñemongaraiŷjá ndajaei mbaeve, pe ñambuayéjá Tûpâ Ñandeyára rembiapoucapy, upéva jae.
20. Upe jeco oico jaguepe oñejenoî ramo guare, upe jecópe voí topytánte.
21. ¿Tembiguaipa racae reñejenoi ramo guare? Upeicharamo, ani ne anguecoi ndeyupe voi upeacue gui. Opaichavévo oime ramo nde reyejepy jaguâ, eñejaânte catuetei upevarâ.
22. Upe tembiguai vaecue oñejenoi ramo guare Ñandeyára rejeguarâ, upéva Ñandeyára rembijepŷma. Upeicha avei pe caraíete vaecue oñejenoi ramo guare, upéva Cristo rembiguaima.
23. Peê voi peyejepŷpa vaecue jepyeté reje. Upeicharamo ani peñemoî tembiguai ramo ybypóra cuera poguŷpe,
24. ja upe jeco oico jaguepe peteî teîva peê, che reyicuerava, pe peñejenoî ramo guare, upeichape peico tapia Tûpâ Ñandeyára ypype.
25. Umi cuña taí imârâŷva gui che ndarecoi mbaeve Ñandeyára jeiuca vaecue cheve. Chente jae, aimoâ jaichante, Ñandeyára che poriajuvereco jague reje cheve aico jaguâ yeroviajá ramo.
26. Jiânte cheve mbae ipôrâ vaicha, oicojá reje co tecôtevê coangagua, ipôrâjá pe cuimbaepe oico jaguâ oguecópe oico jápe jina.
27. ¿Reyuayúpa cuña reje? Upeicharamo, ani reñejaâ reyepoí. ¿Reyepoimapa cuña gui? Upeicharamo, ani rejeca yeby cuñáme.
28. Upeicharamo yepe, remenda ramo cuña reje upepype na ne angaipái. Ja upe cuña taí imârâŷva omenda ramo, upepype ndoyapoi angaipa. Jeta ojasa asynte vaerâ jetepe cuera umichagua. Che voi che râcâteŷ pende reje.
29. Cova che jae, che reyicuera, jiára guâjêmajá, upevareje coanga guive umi oguerecova jembirecope toiconte jembireco-ŷ-vaicha,
30. ja umi oyajeóva toico umi oyajeo-ŷ-vaicha, ja umi oyererojorŷva toico umi oyererojory-ŷ-vaicha, ja umi oñemûva toico, umi isoguévaicha,
31. ja umi oiporúva mbae ybyarigua, toico umi oiporuvaicha jecoitépente. Co yby reco voí ojasa jina ojóvo.
32. Icatu ngau, upeicharamo, aipota peêcuera peime peyepyapy-ŷ-reje. Pe omenda-ŷ-va oyepyapy Ñandeyára mbae reje, ja oñejaâ icatu jaguâ ombojory Ñandeyárape.
33. Pe omendava oyepyapy mbae co ybyarigua reje, ja oñejaâ icatu jaguâ ombojory jembirecope.
34. Ja oime avei oicoejá pe cuña omendava ja pe cuña omenda-ŷ-va: pe cuña omendaŷva ja pe cuña taí oyepyapy Ñandeyára mbae reje imarangatu jaguâ jetépe ja jiángape. Pe cuña omendáva oyepyapy mbae yvyarigua reje ja oñejaâ icatu jaguâ ombojory imenape.
35. Cova jae mante ipôrâ jaguâ peême, ndajaei che amoîse gui peême ñujá, icatu jaguânte peico meme jeco pôrâitepe Ñandeyára rembiguai ramo iñanguecoi-ŷ-me.
36. Oime ramo peteî jiâjape ogueroŷrôja jina cuña taí itayŷrape inguáinguireitama jina, ja tecôtevê ramo oyeyapo mbae, toyapo oipotajaicha tayŷra. Upeicharamo, ndoyapoi angaipa, tomendante oyueje.
37. Ja oime ramo tuva opyta jâtâva ipyápe, ja na tecôtevêi ramo, ja iya ramo oyapo jaguâ ipyapype oipotáva, ja opytama ramo upeicharaicha ipyápe. ja upeicharamo oñangarecose ramo itayŷra reje imara-ŷ-jápe, jae oyapo pôrâ avei.
38. Upeicharamo, pe omeêva itayŷra cuña taíme omenda jaguâ, oyapo pôrâ, ja pe omeêŷva omenda jaguâ, oyapo pôrâiteve.
39. Pe cuña oyuayu jina imena oicové yave pucu cue, ja imena omano ramo ndiporiveima oyoco vaerâ omenda jaguâ jae oipotavareje, Ñandeyára rejeguandi guive.
40. Opaichavevo, jeco pôrâiteve vaerâ jae opyta ramo upeicha, aimoâjaichante che, ja che aimoâ arecojá Tûpâ Ñandeyára Espiritu avei.