1. Jesús oñe'ẽmba rire ko'ã mba'ére, he'i hemimbo'e kuérape:
2. —Peẽ niko peikuaa, mokõi arahápe Páskua aretéta hína. Ha upévo che, yvypóraicha aju vaekue, añemyakãsãta ha añemosãingóta kurusúre.
3. Upérõ umi pa'i ruvicha, umi Moisés rembiapoukapy mbo'eha, ha myakãhára kuéra Israelgua oñembyatypa pa'i guasu Caifás róga guasúpe.
4. Upépe oñomongeta hikuái mba'éichapa omoñuhã kuaa Jesúspe omyakãsã haguã chupe, ha upéi ojuka.
5. Ha he'i hikuái:—Anínte jajapo arete jave, ani ágã oñepu'ãmba ñande rehe.
6. Jesús oĩ jave Betániape, Simón pe ijai karu vai vaekue rógape,
7. oguahẽ hendápe peteĩ kuña, ha ipópe peteĩ mbayru mba'e hyakuã porã ha hepýva reheve. Ha Jesús oguapy aja mesápe, pe kuña oñohẽ pe mba'e ryakuã porã Jesús akãre.
8. Hemimbo'e kuéra ohechávo upéva ipochy, ha oñepyrũ he'i:—Maerã piko ohundi rei pe mba'e repyete?
9. Upéva niko hepy ome'ẽ vaerã mo'ã, ha hepykuépe oñepytyvõ mboriahúvape.
10. Jesús ohendu upéva ha he'i chupe kuéra:—Maerã piko péicha peñe'ẽ ko kuñáre? Mba'e iporãva niko ko ojapóva che rehe.
11. Mboriahu kuéra niko oiko tapiáta pende apytépe. Chéve katu nda che rereko mo'ãi opa ára.
12. Ko kuña oñohẽnguévo che akãre pe mba'e ryakuã porã, che mbosako'i hína añeñotỹ haguã.
13. Añetehápe ha'e peẽme, mamo oñemyerakuãha rupi marandu porã, yvy jerekuévo, oñemombe'úta avei ko kuña ojapo vaekue, ha oikóta hese mandu'a.
14. Upéi, peteĩ umi 12 Jesús remimbo'e kuérava, hérava Judas Iscariote, oho umi pa'i ruvicha kuéra rendápe.
15. He'i chupe kuéra:—Mbovýpa peme'ẽta chéve aitýrõ Jesús pende pópe?Ha ha'e kuéra ome'ẽ chupe 30 pira pire pláta guigua.
16. Ha upe guive, Judas oheka oikóvo mba'éichapa oitýta Jesúspe ipópe kuéra.
17. Pe oñepyrũha árape arete oje'uhápe mbuja oñembovu'ỹva, Jesús remimbo'e kuéra ou hendápe ha oporandu chupe:—Moõpa reipota rombosako'i ndéve Páskua rembyarete haguã?
18. Ha'e he'i chupe kuéra:—Tapeho ma'ẽra rógape, ha peje chupe: “Ore mbo'ehára he'ika ndéve kóicha: ‘Che ára oguahẽ potáma, ha ahasase nde rógape Páskua arete, che remimbo'e kuéra ndive.’”
19. Hemimbo'e kuéra ojapopa Jesús he'i haguéicha, ha ombosako'i hikuái Páskua ombyarete haguã.
20. Upe pyharépe, Jesús oguapy mesápe umi 12 hemimbo'e kuéra ndive;
21. ha ho'u aja hikuái hembi'u, Jesús he'i chupe kuéra:—Añetehápe ha'e peẽme, peteĩva pende apytégui che moñuhãta hína.
22. Upéva tuicha oguapy hese kuéra, ha oñepyrũ oporandu chupe:—Che Jára, ndachéi mba'épa hína?
23. Jesús he'i chupe kuéra:—Pe imbuja pehẽngue omohe'õva che rembi'úpe, upéva che reitýta.
24. Che, yvypóraicha aju vaekue, amano vaerã voínte, he'iháicha Ñandejára Ñe'ẽ. Ha tojererekóke pe che reitýva umi che rehe ija'e'ỹva pópe. Iporãve vaerã mo'ã chupe ohecha'ỹ rire ára resa.
25. Upépe oñe'ẽ Judas pe oitýtava chupe hína, ha he'i:—Mbo'ehára, ndachéi mba'épa hína?Jesús he'i chupe:—Ndéma niko ere.
26. Okaru aja hikuái, Jesús ohupi ipópe mbuja, ojeaguije me'ẽ rire Tupãme oipehe'ã chupe kuéra, ha he'i:—Kóina pe'u, kóva hína che rete.
27. Upéi ohupi ipópe mbayru kaguy ja'uha, ha ome'ẽ rire Tupãme ijaguije, ombohasa chupe kuéra he'ívo:—Pe'u kóvagui opavave.
28. Kóva niko che ruguy, omoañetéva Tupã ñe'ẽ me'ẽ. Kóva hína che ruguy oñeñohẽva hetáre, ojeheja rei haguã angaipa.
29. Ha ha'e peẽme nda'u mo'ã veimaha ko kaguy, oguahẽ meve upe ára ha'u jeývo kaguy pyahu pene ndive, che Ru oisãmbyhyhápe.
30. Opuraheipa rire hikuái, oho Yvyty Olivotýpe.
31. Upépe Jesús he'i chupe kuéra:—Opavave peẽ che rejapa reíta ko pyharépe. Ñandejára Ñe'ẽme niko he'i: “Ajukáta pe ovecha rerekuápe, ha umi ovecha isarambipa reíta.”
32. Aikove jeývo katu pombyaty jeýta Galiléape.
33. Upépe Pedro he'i chupe:—Opavave nde reja rei ramo jepe, che ndoroheja rei mo'ãi.
34. Ha Jesús he'i chupe:—Añetehápe ha'e ndéve, ko pyharépe voi, gállo osapukái mboyve, nde eréta mbohapy jey nda che kuaaiha.
35. Pedro katu he'i chupe:—Amano vaerã ramo jepe ne ndive, nda'éi chéne ndoroikuaaiha.Ha opavave umi hemimbo'e péicha avei he'i.
36. Upéi Jesús oho hemimbo'e kuéra ndive peteĩ hendápe hérava Getsemaníme. Jesús he'i chupe kuéra:—Pepyta ko'ápe ha peguapy. Che aháta amo gotyo añembo'e.
37. Ha ogueraha Pedro ha umi mokõi Zebedeo ra'y kuérape. Upépe ou eterei oñembyasy ha ojepy'apy.
38. Ha he'i chupe kuéra:—Ñembyasy che jukátava niko che jopy. Pepyta che ndive ko'ápe, ha ani peke.
39. Ha Jesús oho tenondevemi, oñesũ omboja peve isyva yvýre ha oñembo'e kóicha:—Che Túva, ikatu ramo embohasa che hegui ko ñembyasy tuichaite. Opáichavo, anítei oiko pe che aipotáva, pe nde reipotávante toiko.
40. Upéi ou jey umi hemimbo'e kuéra oĩháme, ha ojuhu chupe kuéra okepa joa hína. He'i Pédrope:—Ndaikatúi piko peime che ndive peke'ỹre, sapy'amínte jepe?
41. Ani peke ha peñembo'e ani haguã mba'eve pene py'a ra'ã. Aikuaa pejaposeha iporãva, pende rete katu ikangy.
42. Ha oheja jey chupe kuéra upépe, ha oho oñembo'e kóicha:—Che Túva, ndaikatu mo'ãi ramo embohasa che hegui ko ñembyasy tuichaitéva, toiko nde reipotaháicha.
43. Ou jeývo, ojuhu hemimbo'e kuéra okepa. Hopehýigui, umi hesa oñemboty reipa chugui kuéra.
44. Upémarõ oheja chupe kuéra ha oho jey oñembo'e. Ha pe oñembo'e hagueichaite oñembo'e jey.
45. Upéi, ojevy hemimbo'e kuéra rendápe, ha he'i chupe kuéra:—Pekénte gueteri piko hína? Ko'ágã niko oguahẽma chéve, yvypóraicha aju vaekue yvy ári, che reitývo ñuhãme iñangaipáva.
46. Pepu'ã, jaha, péina oúma pe che reitýtava ñuhãme.
47. Jesús oñe'ẽ aja gueteri hína, Judas peteĩ umi 12 Jesús remimbo'e kuérava oguahẽ. Heta umi hendive oúva kyse puku ha yvyra ipópe kuéra. Ombou chupe kuéra umi pa'i ruvicha ha myakãhára kuéra.
48. Judas, pe oitýtava Jesúspe ñuhãme he'i umi hendive ou vaekuépe:—Upe che ahetũva amomaiteívo, upéva hína ha'e. Upéva pemyakãsã.
49. Ha oñembojávo Jesús rendápe he'i chupe:—Mba'éichapa nde pyhare, mbo'ehára.Ha ohetũ chupe.
50. Jesús he'i chupe:—Che irũ, nde Pya'éke reikopa haguã.Upévo, umi kyse puku ipópe ou vaekue, oñemboja Jesús rehe, omyakãsã chupe ha ogueraha.
51. Upépe, peteĩva umi Jesús ndive oĩva, ohekýi ikyse puku ha oity pa'i guasu rembiguái peteĩre, ha onambi'o chupe.
52. Jesús katu he'i chupe:—Emoinge jey nde kyse puku hyrúpe. Opa umi kyse pukúpe oñorãirõva, kyse pukúpe jeýnte omano vaerã.
53. Ndereikuaái piko ikatuha che Rúpe ajerure, ha aipota ramo, ha'e ikatuha ombou hemimbou kuéra 12 atýpe che pytyvõ haguã?
54. Péicha ajapórõ, piko mba'éicha ojehúta upe Ñandejára Ñe'ẽme he'íva, kóicha tekotevẽha ojehu?
55. Upépe Jesús oporandu umi ou vaekuépe:—Maerã piko kyse puku ha yvyra pende pópe peju che myakãsã haguã mondahárõ guáicha che? Opa árape niko aguapýva pende apytépe Tupaópe pombo'évo, ha upépe nda che myakãsãi.
56. Ha opa ko'ã mba'e ojehu hína, oiko haguã hekoitépe umi mba'e maranduhára kuéra omoĩ vaekue Ñandejára Ñe'ẽme.Upévo hemimbo'e kuéra ohejapa Jesúspe, ha okañymba hikuái.
57. Umi omyakãsã vaekue Jesúspe ogueraha chupe pa'i guasu Caifás rógape, umi Moisés rembiapoukapy mbo'eha ha myakãhára kuéra oñembyatyhápe hína.
58. Pedro katu mombyry guive, oho hapykuéri kuéra pe pa'i guasu róga korapy peve. Upépe oike, ha oguapy umi Tupao pegua ñorãirõhára apytépe oikuaa haguã mba'épa ojehúta.
59. Ha umi pa'i ruvicha, ha myakãhára kuéra opáichavo oheka omoĩ vai haguã Jesúspe, japúpe ramo jepe, ha upevakuére Jesús ojejuka haguã.
60. Opáichavo, ndojuhúi hikuái mba'eve, heta ramo jepe umi oúva ha ijapu. Ipahápema, mokõi kuimba'e opu'ã,
61. ha he'i:—Kóva ko kuimba'e he'i vaekue: “Mbohapy árape niko aitýne pe Tupao ha mbohapy arahápe amopu'ã jeýne.”
62. Upépe, pe pa'i guasu opu'ã ha he'i Jesúspe:—Mba'eve piko ndeere mo'ãi? Nerehendúi piko mba'épa he'i nde rehe hikuái?
63. Jesús katu okirirĩnte. Upépe, pe pa'i guasu he'i chupe:—Tupã oikovéva rérape, ha'e ndéve ere haguã oréve: “Nde piko hína pe Mesías, Tupã Ra'y?”
64. Ha Jesús he'i chupe:—Ndéma niko ere. Ha peẽ che recháta, chéve yvypóraicha aju vaekue, aguapy ramo pe Ipu'akapáva akatúape ha aju ramo arai ári yvágagui.
65. Upéva ohendúvo, pe pa'i guasu omondoro ijao ha he'i:—Kóva ko kuimba'e ojahéi Tupãre. Nañaikotevẽ véima avavére he'i vaerã ñandéve mba'eve. Pehendúma niko pe he'íva Tupãre.
66. Mba'épa peje jajapo vaerã hese?Ha ha'e kuéra he'i:—Hembiapo vai, omano mante vaerã.
67. Upépe, ondyvu hikuái hováre ha oinupã. Oĩ katu ohova petéva chupe,
68. ha upéi he'íva:—Nde Mesías, nde ndajeko maranduhára. Máva piko upe ne nupãva?
69. Pedro, upe aja, oguapy hína okápe, korapýpe. Ha peteĩ kuña umi pa'i guasu rembiguáiva, oñemboja hendápe ha he'i chupe:—Nde niko reiko vaekue avei Jesús Galiléagui ndive.
70. Pedro katu opavave rovake he'i chupe:—Ndaikuaái mávarepa reñe'ẽ reína.
71. Upéi, Pedro oho pe korapýpe ojeikeha gotyo. Upépe ambue kuña tembiguáiva ohecha chupe, ha he'i umi upépe oĩvape hese:—Kóva niko oiko vaekue Jesús, Nazaretgua ndive.
72. Ha Pedro he'i:—Tupã rérare ha'e peẽme: “Ndaikuaái pe kuimba'e upévape.”
73. Upe riremínte, umi upépe oĩva oñemboja Pedro rendápe ha he'i chupe:—Nde niko hína peteĩ ha'e kuérava. Ne ñe'ẽre voi ojehecha kuaa.
74. Upépe Pedro oñepyrũ he'i:—Tupã rérare ha'e peẽme nda che japuiha. Ha Tupã tojahéi che rehe che japu ramo. Ndaikuaái pe kuimba'épe.Ha upevovete oñehendu gállo sapukái.
75. Upépe Pedro imandu'a Jesús he'i hague chupe: “Gállo osapukái mboyve, nde eréta nda che kuaaiha mbohapy jey.” Pedro osẽ okápe ha hasẽ soro.