1. Ko'ãva hína Aarón ha Moisés rogagua, Ñandejára oñe'ẽ ramo guare Moiséspe yvyty Sinaípe.
2. Aarón ita'ýra irundy vaekue: Nadab ijypykue, upéi Abihú, Eleazar ha Itamar.
3. Ha'e kuéra oñemomarangatu vaekue ñandyrýpe Ñandejárape guarã ha oñemoingo pa'i ramo.
4. Nadab ha Abihúpe ojuka vaekue Ñandejára yvy ojeiko'ỹha Sinaí guápe, oikuave'ẽ haguére tata ojeporu'ỹ vaerã Ñandejára peguarã. Ha'e kuéra ndaita'ýra jepéi. Eleazar ha Itamar hembiapo vaekue pa'i ramo, Aarón oikove aja pukukue.
5. Ñandejára he'i Moiséspe:
6. —Emoĩ Leví ñemoñare oipytyvõ haguã pa'i Aarónpe.
7. Ha'e kuéra toipytyvõ Aarón ha opa Israel guápe Jotopa Róga renondépe ha tahembiapo Tekohápe.
8. Ipópe kuéra topyta opa tembiporu Jotopa Róga pegua ha toipytyvõ Israel guápe opa tembiapo Jotopa Róga peguápe.
9. Levíta kuéra rembiaporã ta upévante: toipytyvõ Aarón ha ita'ýra kuérape.
10. Aarón ha ita'ýra kuéra toiko pa'i kuéra rembiapópente. Pa'i'ỹva ojapo ramo pa'i rembiapo tojejuka.
11. Ñandejára he'i Moiséspe:
12-13. —Levíta kuéra topyta che mba'erã. Ajuka ramo guare Egíptope ta'ýra ypykue, amboyke vaekue che mba'erã Israel ñemoñare ra'y ypykue ha imymba ra'y ypykue avei. Ko'ágã, Israel ñemoñare ra'y ypykue rekovia, arekóta che mba'erã levíta kuéra. Che hína opa mba'e Jára!
14. Sinaí yvy ojeiko'ỹháme Ñandejára he'i Moiséspe,
15. oipapa haguã levíta kuéra ojohogagua ha ijypykuére, mitã kuimba'e oguerekóva peteĩ mes guive.
16. Ha Moisés ojapo péicha.
17-20. Leví ita'ýra mbohapy vaekue: Guersón, Quehat ha Merarí. Ko'ãva rérape ojekuaa umi iñemoñare. Guersón ñemoñare Libní ha Simí. Quehat ñemoñare Amram, Ishar, Hebrón ha Uziel. Merarí ñemoñare Mahli ha Musí. Ãva vaekue Leví ra'ykuéra, iñemoñare rupive.
21. Guersón ñemoñare, Libní ha Simeígui osẽ vaekue.
22. Kuimba'e oguerekóva peteĩ mes guive ojepapa 7.500.
23. Ko'ãva omoĩ hekoha Jotopa Róga kupépe, kuarahy reike gotyo.
24. Huvicha kuéra Eliasaf, Lael ra'y.
25. Ha'e kuéra oñangareko Jotopa Róga ahoja ha ijapére, ha poyvi sãingo Jotopa Róga rokẽmeguáre.
26. Avei poyvi sãingo Jotopa Róga korapy peguáre, oĩva Jotopa Róga ha altar jerekuévo, ha poyvi sãingo korapy rokẽ megua ha umi sã nguéra hese guáre.
27. Quehat ra'y kuéra hína Amram, Ishar, Hebrón ha Uziel.
28. Kuimba'e Quehat ñemoñaréva oguerekóva peteĩ mes guive ojepapa 8.600.
29. Ko'ãva oguereko hekoha Jotopa Róga ykére, yvy gotyo.
30. Huvicha Elisafán, Uziel ra'y.
31. Ha'e kuéra oñangareko opa mba'e Tupã koty peguáre. Umíva hína Ñe'ẽ me'ẽ Karameguã, mesa, mba'e rendy pyenda, altar,*f** tembiporu kuéra, poyvi sãingo ha umi mba'e hesegua.
32. Levíta kuéra ruvicha vaekue Eleazar, pa'i Aarón ra'y. Ha'e oisãmbyhy umi oñangarekóvape Jotopa Róga rehe.
33. Merarí ra'y kuéra, Mahli ha Musí.
34. Kuimba'e Merarí ñemoñaréva oguerekóva peteĩ mes guive ojepapa 6.200.
35. Hekoha oĩ Jotopa Róga ykére yvate gotyo, ha huvicha Suriel, Abihail ra'y.
36. Ha'e kuéra oñangareko Jotopa Róga roguyke tábla, yvyra puku, póste ha ipyenda ha opa hembiporu kuérare.
37. Oñangareko avei póste kuéra korapy pegua, ipyenda, yvyra hakua ha isã nguérare.
38. Kuarahy resẽ gotyo, Jotopa Róga rovái ha Jotopa Róga renondépe, oñemohenda jepi Moisés, Aarón ha Aarón ra'y kuéra. Ko'ãva oñangareko Jotopa Róga rehe, Israel ñemoñare rérape. Oimeraẽ pa'i'ỹva ojapóva pa'i rembiapo, ojejukáta.
39. Kuimba'e levíta kuéra oguerekóva peteĩ mes guive Moisés oipapa vaekue he'i haguéicha Ñandejára, ohupyty 22.000.
40-41. Ñandejára he'i Moiséspe:—Opa Israel ra'y ypykue, che mba'e hína. Upévare eipapa Israel ñemoñare ra'y ypykue oguerekóva peteĩ mes guive, ha umíva rekovia aipota che mba'erã levíta kuéra. Che hína opa mba'e Jára! Aipota avei che mba'erã levíta kuéra mymba ra'y ypykue, Israel ñemoñare mymba ra'y ypykue rekovia.
42. Moisés ojapo péicha ha oipapa Israel ñemoñare ra'y ypykue.
43. Oguerekóva peteĩ mes guive, ohupyty 22.273.
44. Tupã he'i Moiséspe:
45. —Topyta che mba'erã levíta kuéra, Israel ñemoñare ra'y ypykue rekovia ha ta che mba'erã avei levíta kuéra rymba ra'y ypykue, Israel ñemoñare mymba ra'y ypykue rekovia.
46. Israel ñemoñare ra'y ypykue katu hetave levíta kuéra ra'y ypykuégui, ombohasa chupe kuéra 273 kuimba'épe.
47. Peteĩ-teĩ umívare, Israel ñemoñare tome'ẽ 5 pláta pehẽngue, tenda marangatu pegua viru, upéva hína pláta pehẽngue ipohýiva 11 grámo.
48. Ha pe viru, Aarón ha ita'ýra kuéra mba'erã.
49. Moisés ojapo péicha,
50. ha ombyaty 1.365 pláta pehẽngue, tenda marangatu pegua viru,
51. ha ome'ẽ Aarón ha ita'ýra kuérape, Ñandejára he'i haguéicha.