1. Ko'ẽ mboyve, Labán opu'ã ohetũ itajýra kuéra ha imemby kuérape, ohovasa chupe kuéra ha upéi oho jey hógape.
2. Jacob oipykúi tape ha osẽ huguãitĩvo Tupã remimbou*f** kuéra.
3. Ha Jacob ohechávo chupe kuéra he'i: “Kóva hína Tupã rekoha”.Upévare upe oguahẽ hague ombohéra Mahanaim.
4. Jacob omondo henonderã hembijokuái kuéra yvy hérava Seír, Edom retãme, ityke'ýra Esaú rendápe.
5. Ha he'i chupe kuéra:—Kóicha peje karai Esaúpe: “He'ika ndéve Jacob oiko hague Labán ndive ko'ágã peve ha oho jeymaha itúva rógape.
6. Oguerekoha heta vaka, vúrro, ovecha, hembiguái kuimba'e ha kuñáva, ha ne momarandu oñemoĩ porãségui ne ndive.”
7. Ou jeývo Jacob rembijokuái he'i chupe:—Roñemboja nde ryke'y Esaú rehe ha rojuhu ouha ndéve 400 kuimba'e reheve.
8. Jacob okyhyje ha ojepy'apy. Omboja'o hogagua kuéra mokõi atýpe ha upéicha avei ijovecha, vaka ha kaméllo kuéra.
9. He'i ipy'apýpe:“Ojeity ramo Esaú peteĩ atýre, upe ambue ikatúta okañy chugui.”
10. Upéi Jacob oñembo'e kóicha:“Tupã, che jarýi Abraham ha che ru Isaac Jára, ejapysakami che ñembo'ére. Ere vaekue niko chéve aha jey haguã che retãme ha reimetaha che ndive.
11. Chéve niko ndaijái voi kuri ahupytývo umi mba'e porãita reme'ẽva chéve, ha upe py'a porã reiporúva che ndive. Ahasávo Jordán mboypýri areko vaekue peteĩ yvyra ajekohánte che pópe, ha ko'ágã ajevy mokõi aty guasu reheve.
12. Ani kena che reja ha'a che ryke'y Esaú pópe. Akyhyje ou ramo guarã ore jukapávo, che rembireko kuéra ha che mitã nguérape avei.
13. Ne mandu'áke reme'ẽ hague chéve ne ñe'ẽ osẽ porãtaha chéve opa mba'e, ha reme'ẽtaha chéve ñemoñare ikatu'ỹva ojepapa heta etereígui, yvyku'i ra'ỹi yguasu rembe'ýpe guáicha.”
14-16. Ohasa rire upépe pyhare, oiporavo hymba kuéra apytégui ome'ẽ haguã jopói ramo ityke'ýra Esaúpe: 200 kavara kuña ha 20 máchova, 200 ovecha kuña ha 20 máchova, 30 kaméllo imemby ramóva imemby kuéra reheve, 40 vaka ha 10 tóro, 20 vúrro kuña ha 10 máchova.
17. Upéi omboatýra atýra ha ome'ẽ hembiguái kuérape ogueraha haguã ityke'ýra Esaúpe he'ívo:—Tapeho che renonderã, ha ani peho oñondivepa.
18-19. Tenonde guápe he'i:—Nde juhúvo che ryke'y Esaú ha oporandu ndéve mávapa nde jára, mamópa reho ha máva mba'épa umi mymba reraháva, ere chupe: “Ko'ãva Jacob mba'e ha ogueruka ndéve jopói ramo; ha'e voi ou hína ore rapykuéri”.
20-21. Upéicha avei he'i umi hapykuerigua ogueraháva hymba kuérape. Jacob he'i ipy'apýpe: “Ambopochy jeráta chupe ko'ã jopói amondóva che renonderã reheve. Upéicha ramo ikatu ndaipochy véima che ndive aguahẽvo hendápe.”
22. Upévare omondo umi jopói henonderã, ha opyta upe pyhare hekohápe.
23. Upe pyharépe voi ogueraha mokõive hembireko, mokõive ikuña ha umi 11 ita'ýra ha ombohasa chupe kuéra ysyry Jaboc mboypýri.
24. Ogueraha avei opa mba'e oguerekóva,
25. ha opyta ha'eño tapykuépe. Upérõ ou peteĩ oñorãirõva hendive ko'ẽmba peve.
26. Ha ohechávo ndaipu'akaiha Jacob rehe, oinupã humbýpe ha omokarẽ.
27. Upéi he'i chupe:—Epoi che hegui, ko'ẽmbáma niko.Jacob he'i chupe:—Ndapoi mo'ãi nde hegui nda che rovasái ramo.
28. Upe kuimba'e oporandu chupe:—Mba'éichapa nde réra?Ha'e he'i:—Jacob.
29. Ha upe kuimba'e he'i chupe:—Na nde réra mo'ãvéi upéicha. Nde rérata Israel, reñorãirõ haguére Tupã ha kuimba'e kuéra ndive, ha nde pu'aka hese kuéra.
30. Jacob he'i chupe:—Ha ndépa mba'éicha nde réra?Ha upe kuimba'e he'i:—Maerãpa reikuaase?Ha upepete voi ohovasa chupe.
31. Jacob he'i: “Ahecha Tupã rova tee ha namanói.” Upévare ombohéra Penuel upe oñorãirõ hague.
32. Kuarahy osẽ jave, Jacob oguata karẽ ohóvo, Penuélgui osẽvo.
33. Umi Israelgua ko'agãite peve, ho'u ramo so'o ndo'úi humby rajygue, Tupã oinupã haguére humby rupi Jacóbpe ha omokarẽ chupe.