23. ha he'i chupe:—Máva rajy piko nde? Ikatúnepa apyta che irũ nguéra ndive pende rógape ko pyhare?
24. Ha Rebeca he'i:—Che, niko hína Betuel rajy. Che ru katu Nahor ha Milcá ñemoñare.
25. Ógape oĩ pepyta haguã ha oĩ avei pene kaméllo kuérape guarã heta hembi'urã.
26. Upérõ pe karai oñesũ omomba'e guasu Ñandejárape,
27. ha he'i: “Tojererohory Ñandejára, Abraham Tupã, ohechauka haguére ohayhuha chupe, ha oĩha iñe'ẽme ome'ẽ vaekue chupe. Ha'e che reru ajavy'ỹre che rape, che jára róga rehegua kuéra rogaite peve.”
28. Upe kuñataĩ oho pya'e isy rógape omombe'úvo opa mba'e.
29. Rebeca oguereko peteĩ ikyvy hérava Labán. Ha'e pya'ete oho ykua gotyo upe karai rendápe,
30. ohechágui upe namichãi ha umi jeguaka pyapy rehegua oguerekóva ijehe heindy, ha ohendúgui he'i ramo: “Pehendumi ko he'i vaekue chéve pe kuimba'e…”Upérõ oho upe kuimba'e píari, oñembo'ýva gueteri hína ikaméllo ykére, ykua rembe'ýpe,
31. ha he'i chupe:—Jahána che ndive ógape nde karai. Ñandejára niko nde rovasa ha naiporãi repyta okápe rei. Amonandíma pene rendaguã ha oĩ avei pene kaméllo kuéra rendaguã.
32. Abraham rembiguái oho hendive ha oike hógape. Labán katu omboi ha omongaru ikaméllo kuéra. Upéi oguenohẽ y upe kuimba'e ha iñirũ nguéra ojepyhéi haguã.
33. Oñemoĩvo chupe hembi'urã, upe kuimba'e he'i:—Nda'u mo'ãi mba'eve, ha'epa mboyve peẽme ko ha'e vaerã.Labán he'i chupe:—Eñe'ẽ katu.
34. Upépe ha'e oñepyrũ kóicha:—Che hína Abraham rembiguái.