9-10. Besalel ojapo Tekoha korapy. Ijyke yvy gotyo omongora 45 métro poyvi inimbo línope, ojepysóva 20 póstere, oguapýva 20 pyenda vrónse ári. Ity'ãi ha argólla kuéra katu plátagui ojapo.
11. Ijyke nórte gotyo avei omongora 45 métro poyvi inimbo línope, ojepysóva 20 póste rehe oguapýva 20 pyenda vrónse ári. Ity'ãi ha argólla pláta reheve.
12. Kuarahy reike gotyo omongora 22 métro imédio poyvípe, 10 póste ha 10 pyenda vrónse, ty'ãi ha argólla pláta reheve.
13. Kuarahy resẽ gotyo omoĩ avei 22 métro imédio poyvi.
14. Peteĩ korapy rokẽ yképe omoĩ 7 métro poyvi, mbohapy póste ha mbohapy pyenda reheve.
15. Ha ijyke ambuépe omoĩ avei 7 métro poyvi mbohapy póste ha mbohapy pyenda reheve.
16. Poyvi Tekoha korapy jere rehegua, inimbo línogui meme.
17. Póste pyenda kuéra vrónsegui, ity'ãi ha ijargólla kuéra katu plátagui ha umi póste akã ojejaho'i plátape. Póste kuéra tupao korapy pegua oguerekopa argólla pláta.
18. Poyvi hovy, poyvi pytãũ ha poyvi pytã inimbo línogui, oĩva korapy rokẽme, oñembojegua ha ipuku 9 métro. Ijyvatekue katu, poyvi kuéra korapýpe guáicha, 2 métro 25 sentímetro avei.
19. Oguereko irundy póste irundy pyenda vrónse reheve, ity'ãi ha ijargólla kuéra plátagui, ha póste akã nguéra ojejaho'i plátape.
20. Mba'e hakua kuéra ojekutúva yvýre ha ojeporúva oñemosã haguã tóldo Tekoha pegua ha poyvi korapy pegua, vrónse meme.
21. He'ígui Moisés, levíta kuéra*f** oipapa ita vera kuéra ojeporúva tupao apópe ha pa'i Aarón ra'y Itamar, omyakã jepapa ojejapóva.
22. Besalel, upéva Urí ra'y ha Hur remineno ha Judá ñemoñaregua, ojapo opa mba'e Tupã he'i vaekue Moiséspe ojejapo haguã.
23. Oipytyvõ chupe Oholiab Ahisamac ra'y, upéva Dan ñemoñaregua ha omba'apo kuaa fiérrore, ojapo kuaa poyvi inimbógui ha ombojegua kuaa poyvi hovy, poyvi pytãũ, poyvi pytã ha poyvi líno.
24. Tekoha apópe ojeporu óro oñeme'ẽ vaekue Ñandejárape Tekoha peguarã. Upéva ohupyty 965 kílo ha 30 grámo, oñeha'ãva ojeporúvo pohýi ra'ãha Tekoha pegua.
25. Pláta oñembyaty vaekue Israelgua jepapa oiko ramo guare, ohupyty 3.319 kílo ha 525 grámo, oñeha'ãva ojeporúvo pohýi ra'ãha Tekoha pegua.