1-3. Jacob ra'y ypykue Rubén ra'y kuéra, ko'ãva: Hanoc, Falú, Hesrón ha Carmí. Jepe Rubén ta'ýra ypykue vaekue, noñeme'ẽi chupe upe ta'ýra ypykue jehovasa paha, orãirõ haguére itúva kuñáme, ha ko jehovasa opyta José ra'y kuérape. José vaekue ambue Jacob ra'y. Opáichavo Judá vaekue pe ipokatuvéva tyvýra kuéra apytépe ha chugui osẽ peteĩ mburuvicha, ta'ýra ypykue jehovasa paha katu José mba'e vaekue.
4-6. Joel ñemoñare, ãva vaekue: Semaías, Gog, Simí, Micaías, Reaías, Baal ha Beerá, rubeníta kuéra ruvicha. Kóvape ogueraha vaekue ñorãirõhágui hembiguáirõ Asiria ruvicha guasu Tiglat-Piléser.
7. Beerá ryvy kuéra, umi rogagua ojepapa haguéicha, ãva vaekue: upe ypykue Jeiel, upéi Zacarías
8. ha Bela, Asaz ra'y ha Semá, Joel ra'y, niéto. Bela oiko Aroérpe ha ijyvy ojepyso yvyty Nebo ha Baal-Meón peve.
9. Kuarahy resẽ gotyo oñemohenda pe yvy ojeiko'ỹha rembe'y peve ojepysóva ysyry guasu Éufratesgui, hymba kuéra niko oñemboheta eterei vaekue Galaad yvýpe.
10. Mburuvicha guasu Saúl oisãmbyhýrõ guare, umi rubeníta oñorãirõ umi agaréno ndive. Ipu'aka hese kuéra ha oñemohenda Galaad yvýgui kuarahay resẽ gotyo.
11. Gad ñemoñare oiko vaekue rubeníta rovái, Basán yvýpe, táva Salcá peve, ãva vaekue:
12. Joel, pe ypykue, ha kóva rire Safán, upéi Jaanai ha upéi Safat.
13. Ipehẽngue kuéra, ojohogaguáre ojepapáva, ãva hína: Micael, Mesulam, Sebá, Jorai, Jacán, Zía ha Éber, 7 opavave.
14. Umíva vaekue Abihail ra'y kuéra. Abihail, Huri ra'y. Huri, Jaroa ra'y. Jaroa, Galaad ra'y. Galaad, Micael ra'y. Micael, Jesisai ra'y. Jesisai, Jahdo ra'y. Jahdo, Buz ra'y.
15. Ahí, Abdiel ra'y ha Guní niéto, hogagua ruvicha vaekue.
16. Opa ha'e kuéra oiko vaekue Galaádpe, yvy Basán ha itáva kuérape ha Sarón ñu rupi, ijyvy rembe'y peve.
17. Opa ha'e kuéra ojepapa ha héra kuéra ojehai rogagua kuatiápe, Judá ruvicha guasúrõ guare Jotam ha Israel ruvicha guasu Jeroboam.
18. Rubén ha Gad ñemoñare ha mbytere Manasés ñemoñaregua ñorãirõhára py'a guasu vaekue, oiporúva mo'ãha, kyse puku ha hu'y ha oñorãirõ kuaáva. Umíva 44.760 kuimba'e ñorãirõrã.
19. Oñorãirõ vaekue agaréno kuéra, Jetur, Nafís ha Nodab ndive.
20. Tupã oipytyvõ chupe kuéra ha umi agaréno ha iñirũ nguéra ho'a ipópe, ha'e kuéra ojerure haguére Tupãme ñorãirõ jave oipytyvõ haguã chupe kuéra. Tupã oipytyvõ chupe kuéra ojeroviágui hese.