1. Aarón ñemoñaregua oguereko avei araka'épa omba'apóta. Aarón ra'y kuéra vaekue Nadab, Abihú, Eleazar ha Itamar.
2. Nadab ha Abihú katu omano itúva mboyve, iñemoñare'ỹre. Upérõ Eleazar ha Itamar ári ho'a pe pa'i rembiapo.
3. Davídpe oipytyvõ Sadoc Eleazar ñemoñare ha Ahimélec Itamar ñemoñare, omboja'o haguã Aarón ñemoñare guápe aty-atýpe, he'ívo araka'épa peteĩ-teĩ ojapóta hembiapo tupaópe.
4. Eleazar iñemoñare kuimba'e hetave Itamárgui ha upévare oñemboja'ovo umi ogagua ruvicha, oĩ 16 Eleazar ra'y apytépe ha 8 Itamar ra'y apytépe.
5. Mokõive aty pegua oñemoĩ hembiapo haguã tupaópe ojeitývo po'a; mokõive apytépe niko oĩ mburuvicha oñemboykéva hembiapo haguã Tupã renondépe tupaópe.
6. Semaías Natanael ra'y, levíta omba'e haíva, ohai héra kuéra mburuvicha guasu ha mburuvicha kuéra renondépe, ha pa'i Sadoc, Ahimélec Abiatar ra'y, pa'i ha levíta rogagua ruvicha kuéra renondépe. Pe po'a ojeity mokõi jey Itamar rehe ha mokõi jey Eleazar rehe.
7-18. Pe po'a ojeitývo, opyta kóicha henda kuéra: 1) Joiarib; 2) Jedaías; 3) Harim; 4) Seorim; 5) Malquías; 6) Mijamín; 7) Cos; 8) Abías; 9) Jesús; 10) Secanías; 11) Eliasib; 12) Jaquim; 13) Hupá; 14) Jesebab; 15) Bilgá; 16) Imer; 17) Hezir; 18) Pisés; 19) Petahías; 20) Hezequiel; 21) Jaquín; 22) Gamul; 23) Delaías; 24) Maazías.
19. Upéicha oñomboja'o hikuái umi ára hembiapo haguãme tupaópe, ome'ẽ haguéicha hembiapoukapy Aarón itúva, Tupã Israel Jára he'ígui chupe.
20. Umi levíta hembýva, ko'ãva: Subael, Amram ñemoñare; Jehedías Subael ñemoñare;