14. Toñembueté Tûpâ Ñandeyára yvaga yvatéetévéjápeve ja co ybyari toyeico pôrâ oñondive jecoitépe umi ybypóra umi oguerojorŷva Ichupe.
15. Upei catu oyeíma ramo umi yvapegua oyeby jaguâ yvape, umi ovecha rerecua jei oyoupe: Yaja mandi Belénpe yajecha jaguâ pe mbae oyeju ramôva co Ñandeyára oicuaaucáva ñandeve.
16. Ja ojo pyae eté ja oyuju Maríape ja Josépe ja pe Mitâ oñeno pe cavayú carujápe.
17. Ja ojecha ramo Ichupe oicuaauca pe ñeê oyee vaecue pe Mitâ reje,
18. ja opa umi ojendu vaecue umimbae ojecharâmô pe jeiva gui ichupecuera umi ovecha rerecua.
19. María voí oguero kîrîrî opa âmbae ipyapype ja imanduá meme ipyápe umi mbae reje.
20. Ja oyeby yeby umi ovecha rerecua ombotuvichávo ja omombeu guasúvo Tûpâ Ñandeyárape ojendu ja ojecha jague reje opa umi mbae oyee jagueicha voí ichupecuera.
21. Uperire pe ocho ára jápe ôguajê omongaraí jaguâ ára pe Mitâme Judio reco rupi, ja ombojéra Ichupe Jesús pe yvapegua ombojéraucá jagueicha Ichupe oñemoña mboyve voí isy ryguepe.
22. Ja ombotŷma ramo umi ára pe Moises oyapouca jagueicha oñemopôtí jaguâ cuña caraí, oguerú Ichupe Jerusalempe ojupi jaguâ Ichupe Ñandeyara ypype;
23. oyeé jaicha pe Ñandeyára Santa Escriturape: Opa mitâ cuimbae ypycue oñejenoî vaerâ marangatu ja icaraí Ñandeyára ypype.
24. Ja oguerú avei pe oñecuameê vaerâ oyeyapouca jaicha pe Ñandeyára Santa Escriturape, mocoî pycui terâ mocoî pycasuró raŷ.
25. Uperamo voí oico vaecue Jerusalempe peteî carai jérava Simeon, carai jecopôrâ ja iñemboécatúva ja ojaarô vaecue jina ou jaguâ upe Israel pytyvôjarârâ. Ja pe Espiritu Santo oi jendive.
26. Oime omomarandu racae voí ichupe pe Espiritu Santo jae omano ŷ vaerâjá ojecha ŷ reje Ñandeyára Cristope.