4. Tá an drochghlúin adhaltrach ag iarraidh comhartha, ach ní thabharfar aon chomhartha di ach comhartha Ióna.” Agus thug sé a chúl leo agus d'imigh leis.
5. Nuair a shroich na deisceabail an taobh thall, bhí dearmad déanta acu ar aon arán a thabhairt leo.
6. Arsa Íosa leo, “Tugaigí aire agus seachnaígí laibhín na bhFairiséach agus na Sadúcéach.”
7. Agus bhí siad á chíoradh acu eatarthu féin, agus iad á rá, “Níor thugamar aon arán linn.”
8. Ba léir sin d'Íosa, agus dúirt sé, “A dhaoine úd an chreidimh bhig, cad chuige daoibh bheith á chíoradh mar sin bhur mbeith gan arán?
9. Nach dtuigeann sibh go fóill? Nach cuimhin libh cúig bhuilín na gcúig mhíle, agus cé mhéid ciseán a bhailigh sibh?
10. Nó nach cuimhin libh seacht mbuilín na gceithre mhíle, agus an méid ciseán a bhailigh sibh?
11. Cad chuige daoibh bheith chomh dall sin nach dtuigeann sibh nach ar arán a bhí mé ag caint. Seachnaígí laibhín na bhFairiséach agus na Sadúcéach.”
12. “Thuig siad ansin nach raibh sé ag rá leo laibhín an aráin a sheachaint, ach teagasc na bhFairiséach agus na Sadúcéach a sheachaint.
13. Anois nuair a tháinig Íosa go ceantar Chaesaría Filipí, d'fhiafraigh sé dá dheisceabail, “Cé a deir na daoine is Mac an duine?”
14. Agus dúirt siadsan, “Deir dream gurb é Eoin Baiste é, agus an dara dream gurb é Elía é, agus dream eile gurb é Ierimía é nó fáidh de na fáithe.”
15. Ar seisean leo, “Ach cé a deir sibhse is mise?”
16. D'fhreagair Síomón Peadar, “Is tú an Críost, Mac an Dé bhí.”
17. Agus d'fhreagair Íosa é, “Is beannaithe tú, a Shíomóin Bar-Ióna! Mar ní fuil is feoil a nocht sin duit, ach m'Athair atá ar neamh.
18. Agus insím duit é, is tú Peadar, agus is ar an gcarraig seo a thógfaidh mise m'eaglais-se, agus ní bhuafaidh cumhachtaí an bháis uirthi.
19. Tabharfaidh mé duit eochracha ríocht na bhflaitheas, agus cibé ní a cheanglaíos tú ar talamh ceanglófar ar neamh é, agus cibé ní a scaoileas tú ar talamh scaoilfear ar neamh é.”
20. Bhagair sé go dian ansin ar na deisceabail gan a insint do dhuine ar bith gurbh é an Críost é.