2. gur iarr air litreacha a scríobh chuig sionagóga na Damaisce, ag údarú dó daoine ar bith dá bhfaigheadh sé, bíodh siad ina bhfir nó ina mná, a chloígh leis an gCúrsa, a dtabhairt leis i ngeimhle go hIarúsaléim.
3. Ansin nuair a bhí sé ar a aistear agus e ag druidim leis an Damaisc, tháinig solas lonrach go tobann ina thimpeall.
4. Thit sé leis sin go talamh, agus chuala sé an glór á rá leis, “A Sháúl, a Sháúl, cad chuige a mbíonn tú ag déanamh géarleanúna orm?”
5. Agus ar seisean, “Cé tú féin, a Thiarna?” Agus dúirt seisean, “Is mise Íosa, a mbíonn tú ag déanamh géarleanúna air;
6. ach éirigh i do sheasamh agus gabh isteach sa chathair, agus inseofar duit cad é a bheas le déanamh agat.”
7. D'fhan a chomhthaistealaithe gan labhairt, ó chuala siad fuaim an ghlóir gan aon duine a fheiceáil.
8. D'éirigh Sáúl den talamh; agus nuair a osclaíodh a shúile, níor fhéad sé ní ar bith a fheiceáil; mar sin treoraíodh isteach chun na Damaisce é ar ghreim láimhe.
9. Agus d'fhan sé i rith trí lá gan amharc na súl aige, agus gan é ag ithe ná ag ól.
10. Anois bhí deisceabal sa Damaisc a raibh Ananias mar ainm air. Dúirt an Tiarna leis in aisling, “A Ananias.” Agus ar seisean, “Seo anseo mé, a Thiarna.”
11. Agus dúirt an Tiarna leis, Éirigh agus gabh go dtí an tsráid a dtugtar An tSráid Dhíreach air, go teach Iúdáis agus cuir tuairisc fir as Tarsus a bhfuil Sáúl mar ainm air; mar b'shiúd ag guíodóireacht é,
12. agus é i ndiaidh fear darb ainm Ananias a fheiceáil ag teacht isteach agus ag leagan a lámh air ionas go bhfaighe sé amharc na súl arís.”
13. Ach ba é a d'fhreagair Ananias, “A Thiarna, chuala mé ó mhórán i dtaobh an duine sin, cad é an scrios atá déanta aige ar do naoimh atá in Iarúsailéim;
14. agus tá údarás aige anseo ó na hardsagairt chun gach duine dá ngaireann ar d'ainm anseo a cheangal.”
15. Ach is é a dúirt an Tiarna leis, “Imigh, mar is soitheach tofa agam féin é le m'ainm a iompar os comhair na nGintlithe agus na ríthe agus os comhair chlann Iosrael;
16. mar nochtfaidh mé dó an méid a chaithfeas sé a fhulaingt mar mhaithe le m'ainmse.”
17. Mar sin d'imigh Ananias go ndeachaigh isteach chun an tí. Agus leag sé a lámha air agus dúirt sé, “A Sháúl, a bhráthair liom, is é an Tiarna losa, a nocht duit ar do bhealach go dtí seo, a chuir chugat mé ionas go bhfaighe tú amharc do shúl agus go líontar den Spiorad Naomh thú.”
18. Agus leis sin thit mar a bheadh lanna dá shúile agus fuair sé amharc na súl arís. D'éirigh sé ansin, agus baisteadh é,
19. agus chaith sé bia agus neartaíodh leis.Chaith sé dornán laethanta i gcuideachta na ndeisceabal a bhí sa Damaisc.