1. Ayn bsunders Goldstückl von n Dafetn: Behüett mi, Herrgot, i vertrau dyr!
2. I haan s yn n Trechtein gsait: "Dyr Herr bist. I wisset nixn, was dyr hinkaem."
3. Habnd s non so vil in n Land mit Götzn mit dene fang myr i gwiß nix an.
4. Wer dene folgt, mueß s säggrisch büessn. I opfert dene Götzn nity; i nennet nit aynmaal ienn Namen.
5. Du, Herr, bist s Uedl, s Um und Auf, mir. Was Guets i haan, kimmt allss von dir her.
6. Ja, ist dös nit dyr schoenste Örbtail? Was kännt myr n i non meerer wünschn?
7. I preis di für mein rechte Einsicht. Non bei dyr Nacht bin i dir dankbar.
8. Önn Herrn vergaess i aau kain Meitt nit. I strauch nit, weil myr er staets beisteet.
9. Drum jublt i, kan gar nit sagn, wie. Mit iem füel i mi ainfach sicher.
10. Du lifertst gwiß mi nit yn n Tood aus. Deinn treuen Diener laasst nit s Grab schaun.
11. Du tuest myr kund, wohin s zo n Löbn geet. Du straalst ayn Freud aus, däß s niemdd fasset. Aus deiner Hand kimmt grad dös Guete.