11. Y nefoedd ydynt eiddot ti, a'r ddaear sydd eiddot ti: ti a seiliaist y byd a'i gyflawnder.
12. Ti a greaist ogledd a deau: Tabor a Hermon a lawenychant yn dy enw.
13. Y mae i ti fraich a chadernid: cadarn yw dy law, ac uchel yw dy ddeheulaw.
14. Cyfiawnder a barn yw trigfa dy orseddfainc: trugaredd a gwirionedd a ragflaenant dy wyneb.
15. Gwyn eu byd y bobl a adwaenant yr hyfrydlais: yn llewyrch dy wyneb, O Arglwydd, y rhodiant hwy.
16. Yn dy enw di y gorfoleddant beunydd; ac yn dy gyfiawnder yr ymddyrchafant.
17. Canys godidowgrwydd eu cadernid hwynt ydwyt ti; ac yn dy ewyllys da y dyrchefir ein corn ni.
18. Canys yr Arglwydd yw ein tarian; a Sanct Israel yw ein Brenin.
19. Yna yr ymddiddenaist mewn gweledigaeth â'th Sanct, ac a ddywedaist, Gosodais gymorth ar un cadarn: dyrchefais un etholedig o'r bobl.
20. Cefais Dafydd fy ngwasanaethwr: eneiniais ef â'm holew sanctaidd:
21. Yr hwn y sicrheir fy llaw gydag ef: a'm braich a'i nertha ef.
22. Ni orthryma y gelyn ef; a'r mab anwir nis cystuddia ef.
23. Ac mi a goethaf ei elynion o'i flaen; a'i gaseion a drawaf.
24. Fy ngwirionedd hefyd a'm trugaredd fydd gydag ef; ac yn fy enw y dyrchefir ei gorn ef.
25. A gosodaf ei law yn y môr, a'i ddeheulaw yn yr afonydd.