23. Ac ar lu llwyth meibion Manasse, Gamaliel mab Pedasur.
24. Ac ar lu llwyth meibion Benjamin, Abidan mab Gideoni.
25. Yna lluman gwersyll meibion Dan, yn olaf o'r holl wersylloedd, a gychwynnodd yn ôl eu lluoedd: ac yr ydoedd ar ei lu ef Ahieser mab Ammisadai.
26. Ac ar lu llwyth meibion Aser, Pagiel mab Ocran.
27. Ac ar lu llwyth meibion Nafftali, Ahira mab Enan.
28. Dyma gychwyniadau meibion Israel yn ôl eu lluoedd, pan gychwynasant.
29. A dywedodd Moses wrth Hobab, mab Raguel y Midianiad, chwegrwn Moses, Myned yr ydym i'r lle am yr hwn y dywedodd yr Arglwydd, Rhoddaf hwnnw i chwi: tyred gyda ni, a gwnawn ddaioni i ti; canys llefarodd yr Arglwydd ddaioni am Israel.
30. Dywedodd yntau wrtho, Nid af ddim; ond i'm gwlad fy hun, ac at fy nghenedl fy hun, yr af.
31. Ac efe a ddywedodd, Na ad ni, atolwg; canys ti a adwaenost ein gwersyllfaoedd yn yr anialwch, ac a fyddi yn lle llygaid i ni,
32. A phan ddelych gyda ni, a dyfod o'r daioni hwnnw, yr hwn a wna'r Arglwydd i ni, ninnau a wnawn ddaioni i tithau.