Hen Destament

Testament Newydd

Diarhebion 10:21-32 Beibl Cymraeg Newydd Diwygiedig yn cynnwys yr Apocryffa 2004 (BCND)

21. Y mae geiriau'r cyfiawn yn cynnal llawer,ond y mae ffyliaid yn marw o ddiffyg synnwyr.

22. Bendith yr ARGLWYDD sy'n rhoi cyfoeth,ac nid yw'n ychwanegu gofid gyda hi.

23. Gwneud anlladrwydd sy'n ddifyrrwch i'r ffôl,ond doethineb yw hyfrydwch y deallus.

24. Yr hyn a ofna a ddaw ar y drygionus,ond caiff y cyfiawn ei ddymuniad.

25. Ar ôl y storm, ni bydd sôn am y drygionus,ond y mae sylfaen y cyfiawn yn dragwyddol.

26. Fel finegr i'r dannedd, neu fwg i'r llygaid,felly y mae'r diogyn i'w feistr.

27. Y mae ofn yr ARGLWYDD yn estyn dyddiau,ond mae blynyddoedd y rhai drygionus yn cael eu byrhau.

28. Y mae gobaith y cyfiawn yn troi'n llawenydd,ond derfydd gobaith y drygionus.

29. Y mae ffordd yr ARGLWYDD yn noddfa i'r uniawn,ond yn ddinistr i'r rhai a wna ddrwg.

30. Ni symudir y cyfiawn byth,ond nid erys y drygionus ar y ddaear.

31. Y mae genau'r cyfiawn yn llefaru doethineb,ond torrir ymaith y tafod twyllodrus.

32. Gŵyr gwefusau'r cyfiawn beth sy'n gymeradwy,ond twyllodrus yw genau'r drygionus.

Darllenwch bennod gyflawn Diarhebion 10