Hen Destament

Testament Newydd

Cân Y Tri Llanc 1:19-31 Beibl Cymraeg Newydd Diwygiedig yn cynnwys yr Apocryffa 2004 (BCND)

19. ac yn ceisio dy ffafr. Paid â'n gwaradwyddo;ond ymwna â ni yn ôl dy addfwynder,ac yn ôl amlder dy drugaredd.

20. Gwared ni yn ôl dy ryfeddodau,a dyro ogoniant i'th enw, O Arglwydd.

21. Cywilyddier pawb sy'n peri niwed i'th weision;gwaradwydder hwy nes iddynt golli pob gallu ac arglwyddiaeth,a dryllier eu nerth hwy.

22. Gad iddynt wybod mai tydi yw'r Arglwydd, yr unig Dduw,a'th ogoniant yn ymledu dros yr holl fyd.”

23. Yr oedd gweision y brenin, y rheini a'u taflodd i mewn, yn dal i boethi'r ffwrnais â nafftha a phyg ac â ffaglau a choed tân,

24. nes i'r fflam neidio naw cufydd a deugain uwchlaw'r ffwrnais.

25. A lledaenodd y fflam, a llosgi'r Caldeaid a ddaliwyd yn sefyll o gwmpas y ffwrnais.

26. Ond daeth angel yr Arglwydd i lawr i'r ffwrnais i fod gydag Asarias a'i gyfeillion, a gyrrodd fflam y tân allan o'r ffwrnais,

27. a gwnaeth i ganol y ffwrnais fod fel petai cawod o leithder yn chwyrlïo trwyddo, ac ni chyffyrddodd y tân â hwy o gwbl, na pheri iddynt unrhyw boen na gofid.

28. Yna, ag un llais, dechreuodd y tri yn y ffwrnais ganu mawl, a gogoneddu a bendithio Duw fel hyn:

29. “Bendigedig wyt ti, O Arglwydd, Duw ein hynafiaid;moliannus a thra dyrchafedig wyt dros byth.

30. Bendigedig yw dy enw gogoneddus a sanctaidd;tra moliannus a thra dyrchafedig yw dros byth.

31. Bendigedig wyt ti yn dy deml sanctaidd a gogoneddus;tra theilwng wyt i'th foliannu a'th glodfori dros byth.

Darllenwch bennod gyflawn Cân Y Tri Llanc 1