15. ug mas bililhon pa sa mga alahas. Wala gayoy butang nga imong ginapangandoy nga makatupong niini.
16. Magpauswag ug magpataas kini sa imong kinabuhi, ug maghatag kadungganan kanimo.
17. Makatabang kini sa imong kinabuhi ug maghatag kanimog maayong kahimtang.
18. Bulahan ang tawong padayong nagmaalamon; ang kaalam maghatag kaayohan ug magpataas sa iyang kinabuhi.
19-20. Pinaagi sa kaalam ug kahibalo, gimugna sa Ginoo ang kalibotan ug ang kalangitan, ug mibuswak ang mga tuboran ug naghatag ang mga panganod ug ulan.
21. Anak, tipigi gayod ang kaalam ug kahibalo sa pagdesisyon kon unsay ensakto. Ayaw tugoti nga mawala kini kanimo,
22. kay makahatag kini kanimog taas ug matahom nga kinabuhi.
23. Ug magkinabuhi ka nga luwas sa katalagman ug dili ka maunsa.
24. Makatulog ka ug mahinanok nga walay ginakahadlokan.
25. Busa dili ka angayng mahadlok kon kalit nga moabot ang makalilisang nga panghitabo o laglagon ang mga daotan,
26. kay makasalig ka nga bantayan ka sa Ginoo; ilikay ka niya sa katalagman.