Daang Tugon

Bag-ong Tugon

Micas 1:1-7 Ang Pulong sa Dios (APSD)

1. Mao kini ang mensahe sa Ginoo bahin sa Samaria ug sa Jerusalem. Gipadayag niya kini kang Micas nga taga-Moreshet sa panahon nga naghari sa Juda si Jotam, si Ahaz, ug si Hezekia. Miingon si Micas:

2. Pamati kamo pag-ayo, tanan kamong mga katawhan nga anaa sa kalibotan, kay magasaksi ang Ginoong Dios batok kaninyo gikan sa iyang balaan nga templo.

3. Paminaw! Mogawas ang Ginoo gikan sa iyang puloy-anan. Mokanaog siya ug molakaw sa tag-as nga mga dapit sa kalibotan.

4. Mangatunaw ang mga bukid nga iyahang matumban sama sa kandila nga nainitan sa kalayo, ug malupyak ang mga kapatagan nga iyahang matumban sama sa yuta nga gibanlasan sa tubig nga gikan sa bakilid.

5. Mahitabo kining tanan tungod kay nagpakasala ang mga katawhan sa Israel ug sa Juda. Ang mga taga-Samaria mao ang nagtukmod sa ubang mga lumulupyo sa Israel sa pagpakasala. Ang mga taga-Jerusalem mao ang nagtukmod sa ubang mga lumulupyo sa Juda sa pagsimba sa mga dios-dios.

6. Busa nag-ingon ang Ginoo, “Laglagon ko ang Samaria ug mahimo na lang kining tamnanan sa ubas. Padahilion ko ang mga bato niini paingon sa kapatagan hangtod nga makita ang mga pundasyon niini.

7. Mangadugmok ang tanang mga imahen sa mga dios-dios sa Samaria, ug mangasunog ang tanang pilak ug bulawan nga gibayad ngadto sa mga babaye nga nagabaligya sa ilang dungog diha sa templo. Nakatigom ang Samaria ug mga imahen pinaagi sa mga gibayad ngadto sa mga babaye nga nagabaligya sa ilang dungog diha sa templo, busa karon kuhaon sa iyang mga kaaway ang mga pilak ug mga bulawan nga gihaklap diha sa iyang mga imahen aron nga gamiton usab nga pangbayad sa mga babaye nga nagabaligya sa ilang dungog.”

Basaha ang bug-os nga kapitulo Micas 1