Daang Tugon

Bag-ong Tugon

Joel 1:14-20 Ang Pulong sa Dios (APSD)

14. Sultihi ninyo ang mga tigdumala sa Juda ug ang tanang mga lumulupyo niini nga magtigom ug magpuasa silang tanan sa templo sa Ginoo nga inyong Dios. Mangayo sila ug tabang sa Ginoo.

15. Hapit na ang adlaw nga manglaglag ang Ginoo nga Makagagahom.

16. Ato mismong nasaksihan kon sa unsang paagi kita nawad-an ug pagkaon ug kon sa unsang paagi nawala ang kasadya sa templo sa Dios.

17. Nangamatay ang mga binhi sa yuta. Ug tungod kay nanguyos ang mga trigo, wala nay sulod ang mga bodega, busa nangaguba na lang kini.

18. Nag-agulo ang mga mananap tungod sa kagutom. Naglibot-libot ang mga baka kay wala na silay sabsabon; bisan pa ang mga karnero nagaantos.

19. Nag-ampo si Joel. Miingon siya, “Nagapanawag ako kanimo, Ginoo, kay nangalaya ang mga sabsabanan ug ang tanang kahoy sa kaumahan nga daw sa gilamoy sa kalayo.

20. Bisan ang ihalas nga mga mananap nagapanawag kanimo, kay mihubas na gayod ang mga suba ug tuboran, ug nangalaya na ang mga sabsabanan nga daw sa gilamoy sa kalayo.”

Basaha ang bug-os nga kapitulo Joel 1