Kapitulo

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14

Daang Tugon

Bag-ong Tugon

Hosea 4 Ang Pulong sa Dios (APSD)

Ang Akusasyon sa Ginoo Batok sa Israel ug sa Iyang mga Pari

1. Kamong mga Israelinhon nga nagapuyo sa yuta sa Israel, pamatia ninyo kining akusasyon sa Ginoo batok kaninyo: “Wala nay tawo sa inyong yuta nga nagamatinumanon, nagahigugma, ug nagaila kanako.

2. Ang pagpanghimaraot, pagpamakak, pagpatay, pagpangawat ug pagpanapaw mao na hinuon ang inyong ginahimo. Miabot na kini bisan asa, ug nagsunod-sunod na ang pagpinatyanay.

3. Tungod niini nagmala ang inyong yuta ug nangamatay ang tanang nagapuyo niini, apil ang tanang klase sa mga mananap — ang nagalakaw, ang nagalupad, ug ang nagalangoy.

4. “Apan kinahanglan walay tawong mopasangil o moakusar ni bisan kinsa, kay kamong mga pari mao ang angay isumbong.

5. Kamo ug ang mga propeta malaglag, adlaw man o gabii. Ug laglagon ko usab ang inyong inahan.

6. “Nalaglag ang akong katawhan tungod kay kulang sila sa kahibalo mahitungod kanako. Kay kamo mismo nga mga pari gisalikway ninyo ang kahibalo mahitungod kanako, busa isalikway ko usab kamo isip akong mga pari. Gikalimtan ninyo ang akong Kasugoan, busa kalimtan ko usab ang inyong mga anak.

7. Samtang nagkadaghan kamong mga pari, misamot usab ang inyong pagpakasala batok kanako. Busa himuon kong kaulawan ang inyong kadungganan.

8. Malipay kamo nga magpakasala ang akong mga katawhan kay makakaon man kamo sa ilang mga halad sa paghinlo.

9. Nagkapareha lang kamong mga katawhan ug mga pari. Silotan ko kamo tungod sa inyong mga daotang gawi; balosan ko kamo sa inyong gipanghimo.

10. Nagakaon kamo, apan dili kamo mabusog. Nagasimba kamo sa mga dios-dios nga gituohan ninyong makahatag ug anak, apan dili kamo manganak tungod kay gisalikway ninyo ako

11. aron sa pagsimba sa mga dios-dios.“Mga katawhan ko, ang bag-o ug daang bino mokuha sa inyong maayong panghunahuna.

Gipanghimaraot sa Dios ang Pagsimba sa mga Dios-dios

12. Nagapangayo kamo ug tambag gikan sa dios-dios nga kahoy, ug sumala ninyo, motubag kini. Gipahisalaag kamo sa espiritu nga nagatukmod kaninyo sa pagsimba sa mga dios-dios, busa gitalikdan ninyo ako sama sa usa ka babayeng nanapaw.

13. Nagahalad kamo ug nagasunog ug insenso ibabaw sa mga bukid ug sa mga bungtod, sa ilalom sa tag-as ug labong nga mga kahoy, kay maayo ang ilang landong. Busa namiga ang inyong mga anak nga babaye ug ang inyong mga umagad nga babaye nanapaw.

14. Apan dili ko sila silotan sa ilang gihimo kay kamo mismong mga lalaki nakighilawas man usab sa mga babayeng nagabaligya sa ilang dungog diha sa templo, ug nagahalad pa kamo uban kanila ngadto sa ilang mga dios-dios. Busa tungod kay wala kamoy panabot, malaglag kamo.

15. “Mga taga-Israel, bisan gitalikdan ninyo ako sama sa usa ka babayeng mananapaw, ayaw ninyo idalahig ang mga taga-Juda.“Ug kamong mga taga-Juda, ayaw kamo pag-adto sa Gilgal ug sa Bet Aven aron sa pagsimba kanako o paghimo ug panaad sa akong ngalan.

16. Gahig ulo ang mga taga-Israel, sama sila sa maidlas nga dumalagang baka. Busa unsaon ko sila pagbantay sama sa mga karnero sa sabsabanan?

17. Nagsimba na sila sa mga dios-dios. Pasagdi na lang sila!

18. Pagkahuman nila ug inom, magpatuyang sila sa pagpakighilawas. Ang ilang mga tigdumala gusto kaayong mohimo sa makauulaw nga mga binuhatan.

19. Laglagon gayod sila nga daw gipalid sa makusog nga hangin, ug maulawan sila tungod sa ilang mga halad ngadto sa mga dios-dios.”