3-4. Unya, miingon ang mga tawo, “Magtukod kita ug usa ka siyudad nga may tore nga sangko sa langit, aron mahimo kitang bantogan ug aron dili kita magkatibulaag sa tibuok kalibotan.” Busa nagbuhat sila ug mga tisa, ug gipagba nila kini ug maayo aron mogahi gayod. Tisa ang ilang gigamit imbes bato. Ug aspalto ang ilang gigamit ingon nga semento.
5. Unya, gitan-aw sa Ginoo ang pagtukod sa siyudad ug sa tore sa mga tawo.
6. Miingon siya, “Kining mga tawhana nagkahiusa ug usa ra ang ilang pinulongan. Ug kining ilang ginabuhat sinugdanan pa lang sa ilang pagabuhaton. Sa dili madugay, mahimo na nila ang tanan nga gusto nilang buhaton.
7. Busa dali, manaog kita ug libogon nato sila pinaagi sa paghatag kanilag lain-lain nga pinulongan aron dili sila magkasinabtanay.”
8. Busa gipatibulaag sila sa Ginoo sa tibuok kalibotan ug naundang ang ilang pagtukod sa siyudad.
9. Busa gitawag kining maong siyudad ug Babel kay didto gilibog sa Ginoo ang sinultihan sa mga tawo, ug gikan didto gipatibulaag niya sila sa tibuok kalibotan.
10. Mao kini ang sugilanon mahitungod sa pamilya ni Shem.Duha ka tuig human sa lunop, sa dihang nag-edad na si Shem ug 100 ka tuig, natawo ang iyang anak nga lalaki nga si Arfaxad.
11. Human matawo si Arfaxad, nagkinabuhi pa gayod si Shem ug 500 ka tuig ug nadugangan pa ang iyang mga anak.
12. Sa dihang nag-edad si Arfaxad ug 35 ka tuig, natawo ang iyang anak nga lalaki nga si Shela.
13. Human matawo si Shela, nagkinabuhi pa gayod si Arfaxad ug 403 ka tuig ug nadugangan pa ang iyang mga anak.
14. Sa dihang nag-edad si Shela ug 30 ka tuig, natawo ang iyang anak nga lalaki nga si Eber.
15. Human matawo si Eber, nagkinabuhi pa si Shela ug 403 ka tuig ug nadugangan pa ang iyang mga anak.
16. Sa dihang nag-edad si Eber ug 34 ka tuig, natawo ang iyang anak nga lalaki nga si Peleg.
17. Human matawo si Peleg, nagkinabuhi pa si Eber ug 430 ka tuig ug nadugangan pa ang iyang mga anak.