1. Gidala ako pag-usab sa tawo didto sa gawas nga agianan sa templo, nga nag-atubang sa sidlakan, apan sirado kini.
2. Miingon ang Ginoo kanako, “Kini nga agianan kinahanglang kanunayng sirado. Dili gayod kini ablihan ug kinahanglan nga wala gayoy moagi dinhi, kay ako, ang Ginoo, ang Dios sa Israel, miagi dinhi.
3. Ang pangulo lang sa Israel ang mahimong molingkod dinhi niining agianan aron sa pagkaon sa gihalad kanako, apan kinahanglang didto siya moagi sa balkon sa agianan, ug didto usab siya mogawas.”
4. Unya gidala ako sa tawo didto sa atubangan sa templo. Didto kami moagi sa agianan sa amihan. Ug didto nakita ko ang gamhanang presensya sa Ginoo nga milukop sa iyang templo, ug unya mihapa dayon ako.
5. Miingon pa gayod ang Ginoo kanako, “Tawo, timan-i ug pamatia gayod pag-ayo ang tanang isulti ko kanimo mahitungod sa tanang tulumanon dinhi sa akong templo. Timan-i gayod kon kinsa ang makasulod sa templo ug ang dili makasulod niini.
6. Ingna ang katawhan sa Israel nga mga masinupakon nga ako, ang Ginoong Dios, nag-ingon, ‘O katawhan sa Israel, undangi na ang inyong mangil-ad nga mga buhat.
7. Ginapasulod ninyo sa akong templo ang mga dili Israelinhon nga wala nakaila sa Dios. Niining paagiha gipasipalahan ninyo ang akong templo samtang nagahalad kamog pagkaon, tambok, ug dugo. Gawas pa sa inyong mangil-ad nga mga buhat, ginalapas pa ninyo ang akong kasabotan.
8. Imbes nga kamo ang modumala sa akong balaan nga mga butang, lain ang inyong gipadumala niini.
9. Busa ako, ang Ginoong Dios, nag-ingon nga walay mga langyaw nga wala nakaila kanako ang makasulod sa akong templo, bisan ang mga langyaw nga nagapuyo uban kaninyo.’