1. Sa ika-12 nga adlaw sa ikanapulo nga bulan, sa ikanapulo nga tuig sa among pagkabihag, miingon ang Ginoo kanako,
2. “Tawo, pag-atubang sa Ehipto, ug panghimaraota ang Faraon nga hari sa Ehipto ug ang tanan niyang katawhan.
3. Ingna siya nga ako, ang Ginoong Dios, nag-ingon: Kontra ko ikaw, Faraon nga hari sa Ehipto. Nahisama ka sa usa ka dakong buaya nga nagalubog sa imong mga suba. Nagaingon ka nga imo ang Suba sa Nilo, ug gihimo mo kini alang sa imong kaugalingon.
4. Apan kaw-itan kog mga taga ang imong apapangig, ug haw-ason ko ikaw gikan sa imong mga suba uban sa mga isda nga namilit sa imong mga himbis.
5. Unya ilabay ko ikaw ug ang mga isda didto sa disyerto, ug magbuy-od ka sa yuta nga walay mokuha ni molubong kanimo. Ipakaon ko ikaw sa ihalas nga mga mananap ug mga langgam.
6. Unya mahibaloan sa tanan nga nagapuyo sa Ehipto nga ako mao ang Ginoo. Kay sama ka sa usa ka huyang nga bugang nga gisaligan sa katawhan sa Israel.
7. Sa dihang migunit sila kanimo nasip-ak ka, ug nasamad ang ilang mga abaga. Sa dihang misandig sila kanimo nabali ka, busa natumba sila ug nabali ang ilang bat-ang.
8. Busa ako, ang Ginoong Dios, nag-ingon nga ipasulong ko ikaw sa mga tawo nga mopatay sa imong katawhan ug sa ilang mga kahayopan.
9. Mahimong awaaw ang Ehipto. Unya mahibaloan ninyo nga ako mao ang Ginoo.“ ‘Tungod kay nagaingon ka nga imo ang Suba sa Nilo ug ikaw ang naghimo niini,
10. kontra ko ikaw ug ang imong mga suba. Laglagon ko ang Ehipto ug maawaaw na kini gikan sa Migdol paingon sa Aswan, hangtod sa utlanan sa Etiopia.
11. Wala nay tawo ug mananap nga moagi niini, ug wala nay mopuyo niini sulod sa 40 ka tuig.
12. Himuon ko ang Ehipto nga labing awaaw sa tanang nasod. Sulod sa 40 ka tuig, ang iyang mga lungsod mahimong pinakaawaaw sa mga lungsod nga nagun-ob. Ug katagon ko ang mga Ehiptohanon sa nagkalain-laing mga nasod.’ ”