4. Ilunod niini ang mga maayong bahin sa karne — mga abaga ug mga paa. Iapil usab ang mga bukog.
5. Ang karne lang sa labing maayong karnero ang imong gamiton. Sugnori kini ug lat-i ang karne ug ang mga bukog.
6. Kay ako, ang Ginoong Dios, nag-ingon: Alaot ang siyudad sa Jerusalem kansang mga lumulupyo mga kriminal. Nahisama kini sa tayaon nga kaldero nga wala malimpyohi. Busa kuhaa sa tinagsa ang sulod niini ug ayaw pilia.
7. Kay ang iyang pagpamatay dayag sa tanan. Ang dugo sa iyang gipamatay gipasagdan lang niya diha sa mga bato nga makita sa tanan. Wala lang gani niya kini taboni ug yuta.
8. Nakita ko kining dugo ug gipasagdan ko kini nga makita sa tanan. Daw nagasinggit kini kanako nga nagapangayo sa akong panimalos.
9. “Busa ako, ang Ginoong Dios, nag-ingon, ‘Alaot ang siyudad sa Jerusalem kansang mga lumulupyo mga kriminal! Ako mismo ang magtapok ug daghang sugnod aron siya sunogon.
10. Sige, dugangi pa gayod ninyo ang sugnod ug unya dagkoti. Lat-i pag-ayo ang karne hangtod nga mahubsan ug mapagod ang mga bukog.
11. Unya itak-ang ang kaldero nga wala nay sulod diha sa mga baga hangtod nga magbaga usab kini. Niining paagiha mahinloan unta ang kaldero ug masunog ang mga taya.
12. Apan bisan unsaon mo pa, ang taya niini dili gayod makuha pinaagi sa kalayo.’
13. “O Jerusalem, ang imong law-ay nga binuhatan mao ang nagpahugaw kanimo. Gitinguha ko nga limpyohan ka, apan midumili ka. Busa magpabilin ka nga hugaw hangtod nga dili mawala ang akong labihan nga kasuko kanimo.
14. Ako, ang Ginoo, nag-ingon nga miabot na ang panahon nga molihok ako, ug walay makapugong kanako. Dili ko gayod kamo kaloy-an, ug dili na mausab ang akong hunahuna. Hukman kamo basi sa inyong gawi ug binuhatan. Ako, ang Ginoong Dios, ang nag-ingon niini.”
15. Miingon ang Ginoo kanako,
16. “Tawo, kuhaon kog kalit ang babaye nga gimahal mo pag-ayo. Apan dili mo siya hilakan, ug dili ka magsubo alang kaniya.
17. Pag-agulo lang sa hilom. Ayaw ipakita ang imong pagbangotan. Ayaw hukasa ang imong turban ug sandalyas, ug ayaw taboni ang imong nawong. Ayaw usab pagkaon sa kalan-on sa mga nagasubo alang sa patay.”
18. Busa sa pagkabuntag gisulti ko kadto sa mga tawo, ug pagkagabii namatay ang akong asawa. Ug pagkasunod nga buntag gituman ko ang gisugo kanako.
19. Unya nangutana ang mga tawo kanako, “Unsay buot mong ipasabot nianang imong gibuhat?”
20-21. Mitubag ako kanila, “Miingon ang Ginoong Dios kanako nga isulti ko kini sa katawhan sa Israel: Andam na ako sa pagpasipala sa akong templo nga inyong dalangpanan, nga inyong gipasigarbo, gipakamahal, ug gikalipay. Mamatay sa gira ang inyong mga kabataan nga nabilin sa Jerusalem.