1. Milabay ang panahon ug namatay si Nahash nga hari sa mga Ammonhon. Ang iyang anak nga si Hanun mao ang mipuli kaniya ingon nga hari.
2. Miingon si David, “Pakitaan ko sa kaayo si Hanun tungod kay maayo ang iyang amahan kanako.” Busa nagpadala si David ug mga opisyal aron sa pagpaabot sa iyang pahasubo kang Hanun tungod sa pagkamatay sa amahan niini.Apan sa pag-abot sa mga opisyal ni David sa yuta sa mga Ammonhon,
3. miingon ang mga opisyal sa mga Ammonhon kang Hanun nga ilang agalon, “Nagtuo ka ba nga pasidunggan ni David ang imong amahan pinaagi sa pagpadalag mga tawo sa pag-unong sa imong kasubo? Wala kaha niya sila ipadala aron maniid sa atong lungsod ug unya laglagon kini?”
4. Busa gipadakop ni Hanun ang mga opisyal ni David ug gikiskisan ang katunga sa ilang mga bangas. Giputlan ang ilang mga bisti gikan sa hawak hangtod sa bat-ang, ug unya gipapauli.
5. Naulawan gayod sila pag-ayo. Sa dihang nabalitaan ni David ang nahitabo, nagpadala siyag mga mensahero sa pagsulti sa iyang mga opisyal nga magpabilin lang una sila sa Jerico hangtod nga motubo ang ilang mga bangas, ayha mamauli.
6. Nakaamgo ang mga Ammonhon nga gipalagot nila pag-ayo si David, busa nagsuhol silag 20,000 ka mga sundalong Arameanhon nga taga-Bet Rehob ug taga-Zoba, 1,000 ka mga sundalo gikan sa hari sa Maaca, ug 12,000 ka mga sundalo gikan sa Tob.
7. Sa pagkadungog ni David niini, gipadala niya si Joab ug ang tibuok kasundalohan aron sa pagpakiggira.
8. Mipahimutang ang mga Ammonhon sa pultahan sa ilang lungsod aron sa pagpakiggira, samtang ang mga Arameanhon nga taga-Zoba ug taga-Rehob ug ang mga sundalo gikan sa Tob ug Maaca didto sa kapatagan.
9. Sa dihang nakita ni Joab nga may mga kaaway diha sa iyang atubangan ug sa iyang likod, gipili niya ang labing maayong mga sundalo sa Israel, ug gipangulohan niya sila sa pagpakiggira sa mga Arameanhon.
10. Ang nahibiling mga sundalo gipapangulohan niya kang Abishai nga iyang igsoon sa pagpakiggira sa mga Ammonhon.
11. Miingon si Joab kang Abishai, “Kon makita mo nga morag mapildi na kami sa mga Arameanhon, tabangi ninyo kami, apan kon kamo ang morag mapildi sa mga Ammonhon tabangan namo kamo.
12. Pagmaisogon kamo! Makiggira kita nga may kaisog alang sa atong katawhan ug sa mga lungsod sa atong Dios. Himuon sa Ginoo kon unsa ang maayo sumala sa iyang kabubut-on.”
13. Unya misulong si Joab uban sa iyang mga tawo, ug nangikyas ang mga Arameanhon gikan kanila.
14. Pagkakita sa mga Ammonhon nga nangikyas ang mga Arameanhon, nangikyas usab sila gikan kang Abishai ug nanulod sa ilang lungsod. Busa mipauli si Joab sa Jerusalem gikan sa pagpakiggira sa mga Ammonhon.
15. Sa dihang nakita sa mga Arameanhon nga napildi sila sa mga Israelinhon, nagtigom sila pag-usab.
16. Gitabangan sila sa ubang mga Arameanhon nga gipatawag ni Hadadezer gikan sa tabok sa Suba sa Eufrates. Miadto sila sa Helam ubos sa pagpangulo ni Shobac nga komander sa mga sundalo ni Hadadezer.
17. Sa pagkahibalo ni David niini, gipatigom niya ang tanang sundalo sa Israel aron sa pagpakiggira. Unya mitabok sila sa Suba sa Jordan ug miadto sa Helam. Mipahimutang ang mga Arameanhon sa pagpakiggira kanila ni David, ug naggira sila.
18. Apan nangikyas ang mga Arameanhon gikan sa mga Israelinhon. Nakapatay sila si David ug 700 ka mga tigkarwahe ug 40,000 ka mga tigkabayo. Napatay usab nila si Shobac nga komander sa mga sundalo.
19. Sa dihang nakita sa mga hari sa mga Arameanhon, nga sakop ni Hadadezer, nga napildi na sila sa mga Israelinhon, nagpasakop sila sa mga Israelinhon ug mialagad kanila. Busa sukad niadto nahadlok na ang mga Arameanhon nga motabang sa mga Ammonhon.