Kapitulo

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14

Daang Tugon

Bag-ong Tugon

Zacarias 4 Ang Bag-ong Maayong Balita Biblia (RCPV)

Ang Panan-awon bahin sa Tungtonganang Suga

1. Ug miduol pag-usab ang anghel nga nakigsulti kanako ug gipukaw niya ako sama nga daw nahikatulog ako.

2. Ug gipangutana ako niya, “Unsay imong nakita?”Giingnan ko siya, “Usa ka tungtonganag suga nga lubos bulawan ug tumoy niini may sudlanan sa lana. Kining tungtonganan may pito ka suga ug ang matag suga may pito ka butanganag pabilo.

3. Ug sa kiliran sa tungtonganag suga may duha ka kahoy nga olibo, ang usa sa tuo ug ang usa sa wala.”

4. Ug gipangutana ko ang anghel nga nakigsulti kanako, “Unsa may kahulogan niini?”

5. Ang anghel mitubag kanako, “Wala ka ba diay masayod ug unsay kahulogan niini?”Gitubag ko siya, “Wala.”

10b. Miingon ang anghel kanako, “Kining pito ka suga mao ang mga mata ni Yahweh nga nagtan-aw sa tibuok kalibotan.”

11. Unya gipangutana ko siya, “Unsa man kining duha ka kahoyng olibo nga anaa sa tuo ug sa wala sa tungtonganan sa suga?”

12. Ug gipangutana ko pa gayod siya, “Unsa may kahulogan niining duha ka sanga sa kahoy nga olibo nga anaa sa kiliran sa duha ka tubo nga bulawan diin modagayday ang lana?”

13. Giingnan ako niya, “Wala ka ba diay masayod ug unsa kini?”Mitubag ako, “Wala.”

14. Unya miingon siya, “Kini mao ang duha ka tawo nga dinihogan aron mag-alagad sa Ginoo sa tibuok kalibotan.”

Ang Saad sa Dios ngadto kang Zerubabel

6. Unya giingnan ako sa anghel nga isulti kining mensahe ni Yahweh nga Labing Gamhanan ngadto kang Zerubabel, “Molampos ka, dili pinaagi sa kusog o sa imong gahom kondili pinaagi sa akong espiritu.

7. Ang mga kakulian nga ingon kadagko sa mga bukid mahanaw sa imong atubangan. Tukoron mo pag-usab ang Templo ug sa diha nga ipahimutang mo ang kataposang bato, mosinggit ang katawhan, ‘Pagkaanindot, pagkaanindot gayod!’”

8. Ug giingnan pa gayod ako sa Ginoo,

9. “Si Zerubabel maoy nagpahiluna sa sukaranan niining Temploha ug siya mao ang mohuman niini. Unya mahibaloan sa akong katawhan nga ako maoy nagpadala kanimo ngadto kanila.

10a. Bisag kinsa nga nagtamay nga hinay ang dagan sa pagtukod niini magmalipayon ra unya kay makita niya nga si Zerubabel nagpadayon pagtukod sa Templo.”