1. Tapos sa kamatay ang Ginoo miingon kang Moises ug kang Eleazar, ang anak ni Aaron nga pari,
2. “Ipha ang tibuok Israel gikan sa nagpanuigon ug 20 ug pataas gikan sa tagsatagsa nila ka banay nga makahimo sa pag-adto sa gubat.”
3. Ug gisulti kini ni Moises ug ni Eleazar nga pari ngadto sa katawhan nga didto sa kapatagan sa Moab daplin sa Jordan didto sa Jerico. Miingon sila,
4. “Ipha ang mga tawo gikan sa nag-edad ug 20 ug pataas.” Kini sumala sa sugo sa Ginoo kang Moises. Ang mga Israelita nga gikan sa Ehipto mao kining mosunod:
5-6. si Ruben nga kinamagulangang anak ni Jacob ug iyang mga kaliwat: si Hanoc, si Palu, si Hezron ug si Carmi uban sa ilang mga kaliwat.
7. Ang mga kaliwat ni Ruben mikabat ug 43,730 ka tawo.
8. Ug ang anak ni Pallu mao si Eliab.
9. Ang mga anak ni Eliab mao si Nemuel, si Datan ug si Abiram. Kini sila mao ang Datan ug Abiram nga gipili gikan sa pundok nga nakiglalis kang Moises ug kang Aaron. Mga kauban sila ni Korah.
10. Naabli ang yuta ug milamoy kanila. Nahurot kini silag kamatay sa dihang gilamoy sa kalayo ang 250 ka tawo ug sila nahimong pasidaan alang sa uban.
11. Apan wala mahiapil ug kamatay ang mga anak ni Korah.
12-13. Mao kini ang mga kaliwat ni Simeon sumala sa ilang tagsatagsa ka panimalay: si Nemuel, si Jamin, si Jaquin, si Zera ug si Saul uban sa ilang mga kaliwat.
14. Mikabat ug 22,200 ang mga kaliwat ni Simeon.
15-17. Ang mga kaliwat ni Gad mao kining mosunod: si Sifon, si Hagi, si Suni, si Osni, si Eri, si Arod ug si Areli uban sa ilang mga kaliwat.
18. Mikabat ug 40,500 ka tawo ang kaliwat ni Gad.
19-21. Ang kaliwat ni Juda mao kining mosunod: si Shela, si Perez ug si Zera uban sa ilang mga kaliwat. Ang mga anak ni Perez mao sila si Hezron ug si Hamul. (Ang duha ka anak nga lalaki ni Juda nga si Er ug si Onan namatay didto sa Canaan.)
22. Ang kaliwat ni Juda mikabat ug 76,500 ka tawo.