1. Sa unang bulan miabot ang katawhan sa Israel sa kamingawan sa Zin ug nagkampo sila didto sa Cades. Namatay didto si Miriam ug didto usab gilubong.
2. Niining higayona walay tubig didto alang sa katawhan ug tungod niini naghiusa sila batok kang Moises ug kang Aaron.
3. Ug ang katawhan nakiglalis kang Moises ug giingnan nila siya, “Maayo pag nahiapil kami sa pagkamatay sa among kaigsoonan atubangan sa Ginoo!
4. Nganong gidala mo man kami nganhi sa kamingawan? Aron ba lang mangamatay kami dinhi lakip ang among mga kahayopan?
5. Ug nganong gikuha mo man kami sa Ehipto ug gidala niining dapit nga lisod puy-an ug dili katamnag trigo o igera o paras o granada ug dinhi wala pa gayoy tubig nga among mainom?”
6. Unya miadto si Moises ug si Aaron ngadto sa pultahan sa Tolda nga Tagboanan ug mihapa sila. Ug mitungha kanila ang himaya sa Ginoo.
7. Giingnan sa Ginoo si Moises,
8. “Kuhaa ang imong sungkod nga anaa sa atubangan sa Sudlanan sa Kasabotan ug tigoma ninyo ni Aaron ang mga tawo. Sultihi kanang bato nga anaa diha ug kana mohatag ug tubig alang sa mga tawo. Niining paagiha kahatagan ninyog mainom ang mga tawo ug ang ilang kahayopan.”
9. Unya gikuha ni Moises ang sungkod sumala sa gisugo kaniya sa Ginoo.
10. Ug gitigom ni Moises ug ni Aaron ang mga tawo atubangan sa bato ug miingon siya kanila, “Pamati kamo, mga masupilon! Hatagan ba kamo namog tubig gikan niining maong bato?”
11. Unya giisa ni Moises ang iyang kamot ug gibunalan niya sa makaduha ang bato ug mibul-og gikan sa bato ang daghang tubig ug nanginom ang mga tawo ug ang ilang kahayopan.
12. Apan gibadlong sa Ginoo si Moises ug si Aaron, “Kay wala man ako tuohi ninyo aron balaanon ako sa mga tawo sa Israel, dili kamo maoy mangulo sa mga tawo ngadto sa yuta nga akong gihatag kanila!”
13. Kini mao ang mga tubig sa Meriba. Dinhi gibasol sa katawhan sa Israel ang Ginoo ug dinhi usab gipakita niya nga siya balaan.
14. Nagsugo si Moises ug mga tawo gikan sa Cades ngadto sa hari sa Edomea aron pagsulti sa hari, “Kini mao ang giingon sa inyong mga igsoon, ang mga banay sa Israel: Ikaw nasayod sa tanang katalagman nga miabot kanamo.
15. Nasayod ka nga ang among mga ginikanan miadto sa Ehipto ug mipuyo kamig dugay didto apan gidaugdaog kami sa mga Ehiptohanon.
16. Busa nagpakitabang kami sa Ginoo ug gipatalinghogan niya kami. Gipadad-an kami niyag usa ka anghel nga maoy mikuha kanamo gikan sa Ehipto. Karon ania kami sa Cades, usa ka siyudad sa utlanan sa imong yuta.
17. Tugoti kami karon sa paglatas sa imong yuta. Dili namo agian ang inyong mga uma o parasan o mokuhag tubig sa inyong mga atabay. Maoy among agian ang Dalan sa Hari ug dili kami magtipastipas.”
18. Apan mitubag ang hari sa Edomea, “Ayaw kamo pag-agi aron dili kamo mahiagom sa akong espada.”
19. Ug mitubag ang katawhan sa Israel, “Mosubay kami sa dakong dalan. Ug kon kami ug ang among kahayopan makainom sa inyong tubig, bayran ka namo; paagia lamang kami.”
20. Apan miingon ang hari sa Edomea, “Dili kana mahimo.” Ug unya ang mga taga-Edomea nagtigom aron sa pagpakig-away kanila.
21. Ug kay wala man nila sila paagia nangitag laing agianan ang mga Israelita.
22. Ug mibaktas sila gikan sa Cades ug ang katawhan sa Israel miabot sa Bukid sa Hor.
23. Ug didto sa Bukid sa Hor, dapit sa utlanan sa Edomea, giingnan sa Ginoo si Moises ug si Aaron,
24. “Mamatay dinhi si Aaron ug dili siya makasulod sa yuta nga gihatag ko sa katawhan sa Israel kay nagmasupilon man kamong duha sa akong sugo didto sa tubig sa Meriba.
25. Dad-a si Aaron ug ang iyang anak nga si Eleazar ngadto sa Bukid sa Hor.
26. Hukasi si Aaron sa iyang bisti sa pagkapari ug isul-ob kini kang Eleazar nga iyang anak. Didto mamatay si Aaron.”
27. Gibuhat ni Moises ang sugo kaniya sa Ginoo ug mitungas sila sa Bukid sa Hor atubangan sa tanang katawhan.
28. Ug gihukasan ni Moises si Aaron sa iyang bisti sa pagkapari ug gisul-ob niya kini kang Eleazar. Ug namatay si Aaron didto sa tumoy sa bukid. Unya nanglugsong si Moises ug si Eleazar.
29. Ug sa pagkasayod niini sa katawhan nga patay na si Aaron, ang tibuok banay sa Israel nagbangotan alang kaniya sulod sa 30 ka adlaw.