1. Nagbagulbol ang katawhan bahin sa kalisdanan nga ilang nahiagoman. Sa pagkadungog niini sa Ginoo, nahaling ang iyang kasuko ug misilaob ang kalayo sa Ginoo sa ilang taliwala ug gilamoy niini ang pipila ka kasikbit nga mga bahin sa kampo.
2. Unya ang katawhan nagpakitabang kang Moises ug si Moises nag-ampo sa Ginoo ug miundang ang kalayo.
3. Busa ang maong dapit ginganlan ug Tabera kay misilaob man ang kalayo sa Ginoo sa taliwala nila.
4. Ang mga langyaw nga mikuyog kanila gihidlaw pag-ayo sa maayong pagkaon. Bisan gani ang katawhan sa Israel gihidlaw usab ug miingon, “Maayo unta kon makakaon kitag karne!
5. Nahinumdoman nato ang isda nga atong gikaon sa Ehipto nga wala lamay bayad, ang mga pipino, ang mga melon, ang mga bawang, ang mga sibuyas ug mga ahos.
6. Apan karon nawad-an na kitag umoy ug wala na gayoy makaon gawas niining mana.”
7. Ang mana sama sa gagmayng liso ug ang hitsura niini dalag nga may pagkapution.
8. Manglakaw ang katawhan ug manigom niini. Ila kining galingon o lubkon sa lusong ug lutoon diha sa mga kulon ug himoon nila kining torta. Ang lami niini sama sa torta nga giluto ug lana.
9. Inigkahulog sa yamog ibabaw sa kampo sa panahon sa kagabhion, mahiuban usab niini ang mana.
10. Sa pagkabati ni Moises sa katawhan nga nagmulo didto sa pultahan sa ilang tolda, naguol siya pag-ayo tungod kay misilaob man pag-ayo ang kasuko sa Ginoo.
11. Ug miingon siya sa Ginoo, “Nganong gilisudlisod mo man ang imong alagad? Nganong wala mo man ako kahimut-i? Ug nganong gisangonan mo man ako niining dakong buluhaton pagdumala sa katawhan?
12. Ako bay nanamkon ug nanganak niining katawhan nga moingon ka man kanako, ‘Kugosa sila ingon sa usa ka yaya nga nagkugos ug bata nga masuso ug dad-a sa yuta nga akong gisaad nga ihatag ko ngadto sa ilang katigulangan’?
13. Asa man ako mangitag karne aron ihatag kanila? Kay naghilak sila sa akong atubangan ug miingon, ‘Hatagi kamig karne.’
14. Kon ako lamay pasagdan dili ako makahimo pagdumala niining mga tawhana kay bug-at ra kini alang kanako.
15. Kon mao kini, patya hinuon ako dayon aron dili ako mag-antos.”
16. Ug giingnan sa Ginoo si Moises, “Pagtigom ug 70 ka tawo sa kadagkoan sa Israel nga imong nailhan nga giilang matuod nga mga pangulo sa katawhan. Dad-a sila sa Tolda nga Tagboanan ug patindoga sila didto tupad kanimo.
17. Mokunsad ako ug makigsulti kanimo didto. Bahinan ko sila sa espiritu nga akong gihatag kanimo aron motabang sila kanimo sa pagpas-an sa mga palas-anon nga dili nimo madaog kon mag-inusara ka.
18. Ug ingna ang katawhan, ‘Pagbalaan kamo alang ugmang adlawa ug makakaon kamog karne. Nabati sa Ginoo ang inyong pagtuaw nga nag-ingon, “Kinsay mohatag kanamog karne? Maayo pa ang among pagkabutang didto sa Ehipto.” Busa hatagan kamo sa Ginoo ug karne.
19. Makakaon kamo niini dili lamang sa usa ra ka adlaw o duha o lima o napulo o 20 ka adlaw
20. kondili usa ka bulan gayod. Hatagan kamo niini hangtod nga sum-olan ug lud-on na kamo niini kay gisalikway man ninyo ang Ginoo nga anaa uban kaninyo ug mituaw kamo sa iyang atubangan ug miingon nga nganong namahawa man kami sa Ehipto.’”
21. Apan si Moises miingon sa Ginoo, “Ang mga tawo nga nagbaktas nga akong giihap mikabat ug 600,000 ug miingon ka, ‘Hatagan ko silag karne ug makakaon sila sulod sa usa ka bulan.’
22. May igo bang mga karnero ug mga baka alang kanila? Kon madakop ang tanang isda sa dagat paigo na ba kini kanila?”
23. Ug ang Ginoo miingon kang Moises, “Dili ba diay kini mahimo nako? Makita mo karon kon matuman ba o dili ang akong giingon.”
24. Busa migawas si Moises ug gisuginlan niya ang katawhan sa gisulti sa Ginoo ug nagtigom siyag 70 ka pangulo sa katawhan ug gipahimutang niya sila libot sa Tolda.
25. Unya mikunsad ang Ginoo diha sa panganod ug misulti kaniya ug gikuha sa Ginoo ang ubang bahin sa espiritu nga diha kang Moises ug gihatag kini sa 70 ka pangulo sa Israel. Sa diha na kanila ang espiritu, nagsulti sila sama sa propeta apan sa hamubo lamang nga panahon.
26. Duha sa 70 ka pangulo nagpabilin didto sa kampo: ang usa si Eldad ug ang usa si Medad ug mikunsad usab kanila ang espiritu. Apil sila niadtong gipanglista apan wala sila makaadto sa Tolda busa nagsulti sila sama sa propeta didto sa kampo.
27. Unya usa ka batan-on midagan ngadto kang Moises ug miingon, “Si Eldad ug si Medad nagsulti sama sa propeta didto sa kampo.”
28. Ug si Josue nga anak ni Nun, alagad ni Moises ug usa sa iyang mga sinaligan miingon, “Sir, santaa sila.”
29. Apan si Moises miingon kaniya, “Nasina ka ba tungod ug alang kanako? Kaayo unta kon ibutang sa Ginoo ang iyang espiritu nganha sa iyang katawhan ug silang tanan mahimo nga mga propeta!”
30. Ug mibalik sa kampo si Moises ug ang kadagkoan sa Israel.
31. Unya may hangin nga miabot nga pinadala sa Ginoo ug nagdala kinig mga buntog gikan sa dagat ug gipatugdon kini libot sa ilang gikampohan. Ang gilapdon sa dapit nga gitugpahan sa mga buntog mga usa ka adlaw nga panaw gikan sa usa ka daplin ngadto sa laing daplin ug usa ka metro ang gibag-on niini.
32. Ug niadtong tibuok adlaw ug tibuok gabii ug pagkasunod pa gayod nga adlaw ang katawhan nanakop ug mga buntog ug bisan ang nakakuha ug labing diyutay, nakatigom ug usa ka libo ka kilo ug gibulad nila kini sa tibuok kampo.
33. Samtang ang sud-an anaa pa sa ilang baba ug wala pa matulon, misilaob ang kasuko sa Ginoo batok sa katawhan ug nagpadala ang Ginoo ug sakit ug nangamatay ang daghang mga tawo.
34. Busa kadtong dapita ginganlag Kibrot-hataaba tungod kay gilubong man didto ang mga tawo nga hangol.
35. Gikan sa Kibrot-hataaba ang katawhan mipanaw paingon sa Haserot ug nagpabilin sila didto.